برونائي جي شهزادي عبدالمتين 10 ڏينهن تي ٻڌل شاهاڻي شادي جي تقريبن ۾ پنهنجي پراڻي ساٿڻ انيشا روسنا سان شادي جي ٻنڌڻ ۾ ٻڌجي ويو.
شهزادي عبدالمتين هڪ شاهي مشير جي ڏوهٽيءَ سان شادي ڪئي آهي.
ميڊيا رپورٽس موجب ايشيا جي پرڪشش ڪنوارن مردن جي لسٽ ۾ شامل شهزادي عبدالمتين جي زال سياحتي ۽ فيشن ڪمپني جي مالڪڻ آهي.
شهزادي جون شادي تقريبون سلطان جي سرڪاري رهائش گاهه ۽ دنيا جي سڀ کان وڏي رهائشي محل نورالايمان ۾ ٿيون، جنهن ۾ 1788 ڪمري ۽ 257 باٿ روم شامل آهن.
شهزادي عبدالمتين ۽ انيشا روسنا جي 10 ڏينهن واريون شادي تقريبون روايتي، مذهبي، عوام ۽ سيڪيولر تقريبن تي ٻڌل هيون. شاهي شادي ۾ 5000 مهمانن شرڪت ڪئي جنهن ۾ انڊونيشيا جو صدر ڪوويدودو، فلپائن جي اڳواڻ فرڊينينڊ مارڪوس جونيئر، اردن ۽ سعودي عرب جي شاهي خاندان به شرڪت ڪئي.
شاهي شادي جي ڏينهن شهزادي پنهنجي ڪنوار کان ڌار پهريان محل ۾ پهتو جتي کيس 17 توپن جي سلامتي ڏني وئي ان موقعي تي 40 سپاهين جو جٿو به هن سان گڏ موجود هو، ان کان پوءِ شهزادي جي ڪنوار به شاهي محل پهتي جتي انهيءَ انداز ۾ هن کي به سلامتي پيش ڪئي وئي ٻنهي کي بادشاهه ۽ ملڪه سڀ کان پهريان ڀليڪار چيو.
شاهي شادي جي ڏينهن شهزادي رسمي يونيفارم جڏهن ته سندس ڪنوار ڊگھي اڇي خوبصورت گائون ۽ زيورن جي چونڊ ڪئي.
شادي جي ڏينهن راڄڌاني بندر سيري بيگوان جي روڊن تي جوڙي جي هڪ جهلڪي ڏسڻ لاءِ هزارين ماڻهن جو هجوم ڪيترن ئي ڪلاڪن تائين گڏ ٿيو، گھوٽ ڪنوار رولز روئس گاڏي مان هزارين ماڻهن کي هٿ لوڏيندي پهريون ڀيرو ماڻهن جي سامهون آيا.
واضح رهي ته 31 ڊسمبر تي شهزادي عبدالمتين پنهنجي مڱڻي جو اعلان انسٽاگرام پوسٽ ذريعي ڪيو هو.