اسلام آباد (ويب ڊيسڪ) سپريم ڪورٽ آرٽيڪل 62 ون ايف جي تشريح جو فيصلو ٻڌائيندي تاحيات نااهلي ختم ڪري ڇڏي، جنهن کانپوءِ نواز شريف ۽ جهانگير ترين جي تاحيات نااهلي ختم ختم ٿي وئي آهي.
سپريم ڪورٽ جي فيصلي تحت اڳوڻي وزيراعظم نواز شريف ۽ استحڪام پاڪستان پارٽي جي سربراهه جهانگير ترين جي نااهلي ختم ٿي وئي.
چيف جسٽس قاضي فائز عيسيٰ جي سربراهي ۾ 7 رڪني بئنچ آرٽيڪل 62 ون ايف جي تشريح جي ڪيس جي ٻڌڻي ڪئي ۽ فيصلو 5 جنوري تي محفوظ ڪيو ويو هو.
واضح رهي ته آرٽيڪل 62 ون ايف جي شق تحت 28 جولاءِ 2017 ۾ سپريم ڪورٽ جي 5 رڪني بئنچ اڳوڻي وزيراعظم نواز شريف کي پاناما پيپرز ڪيس ۾ نااهل قرار ڏنو هو.
اهڙي ريت 15 ڊسمبر 2017 ۾ ان وقت تحريڪ انصاف اڳواڻ جهانگير ترين کي به سپريم ڪورٽ جي هڪ الڳ بئنچ ان ئي شق تحت نااهل قرار ڏنو هو.
فيصلي کانپوءِ نواز شريف ۽ جهانگير ترين ٻنهي کي عوامي عهدو رکڻ لاءِ نااهل قرار ڏنو ويو هو.
