ڪوئيٽا( رپورٽ:يار محمد بروهي)بلوچستان نيشنل پارٽي جي سربراهه سردار اختر جان لانگ مارچ بعد شاندار جلسي کي خطاب ڪندي اختر مينگل چيو ته ڊيٿ اسڪواڊ جي خاتمي لاءِ 30 آڪٽوبر تي اسلام آباد ۾ ڌرڻو هڻنداسين، جنرل مشرف کان وٺي 2015ع تائين رڳو اسان لاش کنيا آهن.
هن چيو ته مان واعدو ڪريان ٿو ته جيستائين بلوچستان مان دهشتگردن ۽ ڊيٿ اسڪواڊز جو خاتمو نه ڪيو ويندو، گم ٿيل بازياب نٿا ٿين تيستائين اسان جي جدوجهد جاري رهندي. نوشڪي ۽ ڪوئيٽا ۾ به ماڻهن خلاف ايف آءِ آر داخل ڪئي وئي آهي.
هن چيو ته جيتريون ايف آءِ آر داخل ڪرڻيون آهن ڀلي ڪريو، جيڪڏھن توھان جا ڪاغذ ختم ٿي ويا ته اسان کي ٻڌايو ۽ اسان توھان کي ڪاغذ به موڪلينداسين.
اختر مينگل ته اها رياست جنهن جي ڪتاب ۾ رڳو ظلم ۽ زيادتي هجي، اها ڪيئن انصاف فراهم ڪندي؟ تاريخ مان سبق سکو، بنگلاديش کي نه وساريو، اهو بنگلاديش جتي توهان الشمس ۽ البدر جهڙا موت جي اسڪواڊ ٺاهيا هئا.
هن چيو ته چار ڏينهن اڳ انتظاميه جا ماڻهو آيا ته لانگ مارچ نه ڪيو وڃي ڇو ته سيڪيورٽي رسڪ آهي، مستونگ کان قلات انتهائي حساس علائقو آهي. مون طالبان جو ڇا بگاڙيو آهي؟ مون داعش کي ڇا ڪيو آهي ته اهي مون کي مارين؟ جيڪڏھن توھان اسان کي مارڻ چاھيو ٿا ته پنھنجي طاقت سان ماريو.
هن چيو ته اسان کي واهه ڪينٽ فيڪٽري جي بارود سان ماريو، اسان کي مذهبي انتهاپسندي جي نالي تي نه ماريو، اسان کي قبيلائيت جي نالي تي نه ماريو، اسان مرڻ لاءِ تيار آھيون.
هن چيو ته پاڪستان ۾ هن وقت مارشل لا آهي. مان شيخ رشيد ناهيان ته ڪجهه وقت لاءِ بند ڪري ڇڏيو، جيڪڏهن بند ڪرڻو آهي ته ڏهه سال بند ڪر ته مان به اتي آرام ڪريان. پاڪستان ۾ لاوارث رڳو بلوچ آهن. پاڪستان ۾ عام چونڊون خوني چونڊون ٿينديون ۽ شفاف نه ٿينديون ڇاڪاڻ ته سهولتڪار نگران حڪومت ۾ آهن.
