پشاور (ويب ڊيسڪ) خيبر پختونخواهه ۾ دهشتگردي ۽ ڀتي خوري جي واقعن ۾ گهڻي ڀاڱي افغان سمن جي استعمال جو انڪشاف ٿيو آهي.
دهشتگردي ٽوڙ کاتي هلندڙ سال خيبر پختونخواهه ۾ دهشتگردي جي واقعن تي رپورٽ جوڙي ورتي.
رپورٽ ۾ ٻڌايو ويو آهي ته ڪي پي ۾ دهشتگردي، ڀتي خوري جي واقعن ۾ گهڻي ڀاڱي افغان سمون استعمال ٿينديون آهن، صوبي ۾ دهشتگردي جا 830 ڪيس داخل آهن.
رپورٽ موجب سي ٽي ڊي 601 ڪيسن کي ٽريس ڪيو ۽ هڪ هزار 982 جوابدار سڀني ڪيسن ۾ نامزد ٿيا، جن مان 500 کان وڌيڪ جوابدارن کي گرفتار ڪيو ويو ۽ 216 آپريشنز ۾ مارجي ويا.
سي ٽي ڊي چيو آهي ته 32 ڪيسن ۾ جوابدارن کي عدالت مان سزائون ٿيون ۽ ڀتي خوري جا 80 ڪيس داخل ڪيا ويا، جنهن ۾ 47 ٽريس ٿي ويا آهن.
ڀتي خوري ۾ 197 جوابدار نامزد آهن ۽ 90 هيل تائين گرفتار ڪيا ويا، جڏهن ته ڀتي خوري ۾ ملوث 5 گروپن جو خاتمو ڪيو ويو.
ڊي آءِ جي سي ٽي ڊي عمران شاهد جو چوڻ آهي ته ڀتي ۽ دهشتگردي جي واقعن ۾ افغان سمون استعمال ٿينديون آهن، افغان سمن تائين پهچ ۾ ادارا مسئلن کي منهن ڏيندا آهن پر سي ٽي ڊي کي ڀتي جي ڪالز تي جلد کان جلد ايف آءِ آر داخل ڪرڻ جي هدايت ڪئي وئي.
