اسلام آباد (عوامي آواز نيوز) سپريم ڪورٽ ۾ چيف جسٽس قاضي فائز عيسيٰ جي چارج سنڀالڻ کانپوءِ اميد ظاهر ڪئي پئي وڃي ته سنڌ هاءِ ڪورٽ جي چيف جسٽس احمد علي شيخ کي سينيارٽي بنياد تي سپريم ڪورٽ ۾ مقرر ڪيو ويندو، ڇو ته جسٽس عمر عطا بنديال جي رٽائرمينٽ کانپوءِ اعليٰ عدالت ۾ ٻن ججن جون جايون خالي پيل آهن.
چيف جسٽس قاضي فائز عيسيٰ سينيئر جج جي حيثيت ۾ ان وقت جي چيف جسٽس عمر عطابنديال کي ٻه ڀيرا لکي چڪو هو ته سنڌ هاءِ ڪورٽ جي چيف جسٽس کي سپريم ڪورٽ ۾ مقرر ڪيو وڃي پر عمرعطا بنديال ان ڏس ۾ ڪابه موٽ نه ڏني هئي.
هاڻي جڏهن قاضي فائز عيسيٰ پاڻ چيف جسٽس ٿيو آهي، تڏهن اميد ڪئي پئي وڃي ته سپريم ڪورٽ ۾ ججن جون جايون ڀري جج مقرر ڪري التوا ۾ پيل ڪيسن جو جلد اڪلاءَ جا انتظام ڪيا ويندا.
نوٽ: هيءَ خبر روزاني عوامي آواز ڇنڇر 23 سپٽيمبر 2023ع تي شايع ٿي
