اسلام آباد ( عوامي آواز نيوز ) فوج جي سپهه سالار جنرل عاصم منير معيشيت جي حوالي سان ملڪ جي وڏن واپارين سان ملاقاتون شروع ڪيون آهن.
نامياري صحافي اسدعلي طور جو چوڻ آهي ته لاهور ۾ اٽڪل 60 ۽ ڪراچي ۾ اٽڪل 50 واپارين سان آرمي چيف ملاقاتون ڪيون آهن ، انهن ملاقاتن ۾ آرمي چيف چيو آهي ته اسپيشل انويسٽمينٽ فيسيليٽيشن ڪائونسل ذريعي سعودي عرب ۽ ٻيا عرب ملڪ اٽڪل 25 ارب رپين جي سيڙپڪاري ڪري رهيا آهن
ان کانسواءِ چين، سعودي عرب ۽ ٻيا دوست ملڪ وڌيڪ 25 ارب رپين جي سيڙپڪاري ڪرڻ چاهين ٿا پر ان لاءِ سياسي استحڪام جو شرط رکي رهيا آهن ان ڪري هر صورت ۾ سياسي استحڪام آندو ويندو، هن چيو ته ايندڙ 6 مهينن ۾ معيشيت ۾ بهتري اچي ويندي، عدالت جو اڻ ڌريو هجڻ لازمي آهي ،اميد آهي ته ايندڙ وقت ۾ عدالت به اڻ ڌريو ڪردار ادا ڪندي.
آرمي چيف چيو ته ڊالر جي اسمگلنگ هر صورت ۾ روڪي ويندي، ڪرپشن کي ڪنهن به صورت ۾ برداشت نه ڪيو ويندو،سرحدن تي نگراني سخت ڪئي ويندي، سياست ۾ صفائي ڪئي ويندي، هر سطح تي استحڪام آندو ويندو ۽ معيشت کي مستحڪم ڪيو ويندو.
نوٽ: هي خبر روزاني عوامي آواز سومر 4 سپٽيمبر 2023تي شايع ٿي
