اسلام آباد(ويب ڊيسڪ)شهباز شريف چيو آهي ته ڪارخانن ۾ ٺهندڙ شين جي پيداوار وڌائي، پرڏيهي ملڪن ڏانهن موڪلجندڙ واپار ۾ واڌ آڻڻ لاءِ اثرائتا پاليسي قدم پهرين ترجيح آهن.
وزيراعظم جي صدارت هيٺ سيڙپڪاري وڌائڻ، مختلف شعبن ۾ سڌارن ۽ پاليسي قدمن بابت جائزي وارو ويهڪ ٿي، جنهن ۾ لاڳاپيل کاتن پاران غور هيٺ آيل مختلف پاليسي تجويزن بابت آگاهي ڏني وئي.
ويهڪ ۾ اسحاق ڊار، محمد اورنگزيب، احد چيمه ۽ عطا تارڙ شرڪت ڪئي.
گڏجاڻي کي خطاب ڪندي شهباز شريف چيو ته ملڪ جي ناڻي واري واڌ ويجهه کي ڊگهي مدي تائين قائم رکڻ لاءِ صنعتن جي ترقي ۽ ٻاهرين سيڙپڪاري ۾ واڌ لازمي آهي.
هن چيو ته توانائي جون گهرجون پوريون ڪرڻ لاءِ متبادل ذريعن مان بجلي ۽ توانائي حاصل ڪرڻ بابت ڀرپور ڪم هلي رهيو آهي.
وزيراعظم وڌيڪ چيو ته توانائي بچائڻ ۽ سستي آمدرفت کي هٿي ڏيڻ لاءِ برقي گاڏين بابت پاليسي ضروري آهي.
شهباز شريف اهو به چيو ته سڀني سڌارن ۽ قدمن ۾ انتظامي سچائي، کليل طريقيڪار ۽ بهترين ڪارڪردگي سڀ کان اهم ترجيح آهي.
