آرٽيفيشل انٽيليجنس (اي آءِ) جو استعمال ڪم کي ڏاڍو سولو ڪري ڇڏيندو آهي، پر هي توهان کي ذهني طور تي ڪمزور ڪري سگهي ٿو.
اهڙي دعوا نئين تحقيق ۾ ٿي آهي. پرڏيهي خابرو اداري جي رپورٽ موجب ماهرن تحقيق ۾ ڄاڻايو آهي ته ڏينهن ۾ڪنهن به اي آءِ چيٽ بوٽ کي 10 منٽ استعمال ڪرڻ سان سوچڻ ۽ مسئلن کي حل ڪرڻ جي صلاحيت تي منفي اثر ٿي سگهي ٿو.
رپورٽ موجب ان تحقيق ۾ شامل رضاڪارن کي ٽاسڪ پورو ڪرڻ لاءِ ڏنو ويو، جنهن ۾ ڪجهه کي اي آءِ جي استعمال جي اجازت به ڏني وئي جيئن ٽاسڪ پورو ڪرڻ ۾ مدد حاصل ڪري سگهن. ان موقعي تي تحقيق ۾ ثابت ٿيو ته جڏهن اي آءِ جو سهڪار ختم ڪيو ويو ته ماڻهو غلط جواب ڏيڻ لڳا يا انهن مسئلو حل ڪرڻ تان هٿ کڻي ڇڏيا.
رپورٽ موجب سولن لفظن ۾ اي آءِ جي مدد نه ملي ته ماڻهن لاءِ سوچڻ يا ان تي ڪم ڪرڻ ڏکيو ٿي وڃي ٿو. ماهرن ٻڌايو ته نتيجن جو مطلب اهو ناهي ته تعليمي ادارن يا آفيسن ۾ اي آءِ تي پوري پابندي مڙهي وڃي، ان ٽيڪنالوجي سان ماڻهن کي پنهنجو ڪم بهتر ڪرڻ ۾ مدد ملندي آهي ۽ اهو واقعي ساراهه جوڳو عمل آهي، پر ان حوالي سان احتياط جي ضرورت آهي ته اي آءِ ڪهڙي ۽ ڪڏهن مدد فراهم ڪرڻ گهرجي.
ماهرن وڌيڪ چيو ته اي آءِ ٽولز کي اهڙي ريت ريڊيزائن ڪرڻ جي ضرورت آهي ته جو اها سڌو جواب ڏيڻ جي بجاءِ ڪنهن سٺي استاد وانگر سمجهائي جيئن اسان ان جي مدد وٺڻ کانسواءِ به اڳتي اهو مسئلو پاڻ حل ڪرڻ جي صلاحيت رکي سگهون.
هنن چيو ته سڌي ريت جواب ڏيڻ واري اي آءِ سسٽم ۾ تبديلي جي ضرورت آهي. ماهرن موجب نتيجن مان واضح ٿيئي ٿو ته مختصر وقت تائين (10 منٽ) ڪنهن ڪم لاءِ اي آءِ کان مدد وٺڻ سان ذهني ڪارڪردگي متاثر ٿيئي ٿي.
پر ڪنهن وضاحت لاءِ اي آءِ کي استعمال ڪرڻ سان ذهن تي ڪي خاص منفي اثر نٿا ٿين. ماهرن ٻڌايو ته نتيجا ڪنهن حد تائين ڳڻتي جوڳا آهن ڇاڪاڻ ته مسئلا حل ڪرڻ واري صلاحيت نيون شيون سکڻ واري صلاحيت لاءِ اهم آهي پر جڏهن ڪو فرد اي آءِ سسٽم جي مدد کانسواءِ هارائي ويهي رهي ٿو ته ذهن متاثر ٿيندو آهي.
