لاس اينجلس(ويب ڊيسڪ) مختلف سوشل ميڊيا پليٽفارمز تي اڄڪلهه هڪ دنگ ڪندڙ دعويٰ تيزي سان وائرل ٿي رهي آهي، جنهن ۾ چيو پيو وڃي ته هالي ووڊ سُپر اسٽار اداڪار ليوناڊو ڊي ڪيپريو مبينا طور 70 پائونڊ ”ٻارن جو گوشت“ کاڌو.
اهو انڪشاف تازو جاري ٿيندڙ جيفري ايپسٽين سان لاڳاپيل فائلز ۾ ٿيو آهي، سماجي رابطن جي ويب سائيٽ ايڪس تي ڪجهه پوسٽن ۾ چيو ويو ته اداڪار ليونارڊو ڊي ڪيپريو فلمساز ووڊي ايلن سان اي ميلز ۾ پاڻ کي آدم خور قرار ڏنو.
اهڙي قسم جون ڇرڪائيندڙ دعوائون ڏسي سوشل ميڊيا واهپيدارن ۾ ڳڻتي جي لهر پکڙجي وئي، پر موجود دستاويزن ۽ تصديقي رپورٽن جي جائزي کانپوءِ هڪ بلڪل مختلف حقيقت سامهون آئي آهي.
آمريڪي انصاف واري کاتي طرفان جاري ڪيل لکين دستاويزن، جيڪي ايپسٽين جي نيٽ ورڪ ۽ رابطن بابت آهن، انهن ۾ ليوناڊو ڊي ڪيپريو جو نالو رڳو ڪجهه موقعن تي سامهون آيو هو.
دستاويزن موجب، هڪ اي ميل ۾ اڳوڻي برطانوي سفير پيٽر مينڊلسن ايپسٽين سان ڊي ڪيپريو جي امڪاني برانڊ اينڊورسمنٽ بابت رابطو ڪيو، جڏهن ته ٻي اي ميل ۾ 2016ع دوران اداڪار سان امڪاني ڊنر ملاقات جو ذڪر ڪيو ويو.
اهم ڳالهه اها آهي ته دستاويزن ۾ ڪٿي به آدم خوري، ٻار جي گوشت يا ڪنهن به قسم جي مجرماڻي سرگرمي جو ڪو ذڪر موجود ناهي.
وائرل ٿيل سنگين الزام حقيقت ڪجهه غير تصديق ٿيل ويب سائيٽن ۽ سازشي نظرين تي آڌاريل رپورٽن ذريعي پکڙيا، جن ۾ مبهم اصطلاحن کي غلط نموني پيش ڪري عالمي شخصيتن خلاف تجسس پيدا ڪرڻ جي ڪوشش ڪئي وئي.
سوشل ميڊيا جي ڪميونٽي فيڪٽ چيڪس ۽ آزاد تحقيق موجب، ڊي ڪيپريو جو نالو فائلن ۾ رڳو ان ڪري آيو ڇاڪاڻ ته ايپسٽين مختلف موقعن تي بااثر شخصيتن جا نالا کڻي پنهنجن لاڳاپن ۽ پهچ کي وڌائي بيان ڪندو هو.
عدالتي رڪارڊ ۽ ثبوت مان به پتو پيو آهي ته اداڪار نه ايپسٽين جي ڪنهن ملڪيت تي ڏٺو ويو ۽ نه ئي مٿس ڪنهن به قسم جي بدعنواني يا غيرقانوني سرگرمي جو ڪو الزام ثابت ٿيو آهي.
ماهرن موجب، اِها دعويٰ مڪمل طور ڪوڙي آهي ۽ سوشل ميڊيا تي پکڙيل ورغلائيندڙ مهم جو حصو آهي، فيڪٽ چيڪ مان واضح ٿيو آهي ته ايپسٽين دستاويزن ۾ ليوناڊو ڊي ڪيپريو خلاف آدم خوري يا ڪنهن به سنگين ڏوهه جو ڪو ثبوت موجود ناهي.
