راولپنڊي (ويب ڊيسڪ) پاڪستان جي ٽي ٽوئنٽي ٽيم جي ڪپتان سلمان علي آغا چيو آهي ته ايندڙ سال ٽي ٽوئنٽي ورلڊ ڪپ کان اڳ آل رائونڊر شاداب خان لاءِ قومي ٽيم ۾ واپسي جا دَر بند ناهن ٿيا.
واضح رهي ته شاداب خان آخري ڀيرو بنگلاديش خلاف جون ۾ ٽي ٽوئنٽي سيريز ۾ پاڪستان جي نمائندگي ڪئي هئي، جنهن کانپوءِ هو انجريءَ سبب ٽيم کان ٻاهر ٿي ويو.
شاداب خان جي غير موجودگي ۾ آل رائونڊر محمد نواز بهترين ڪارڪردگي ڏيکاري آهي، صائم ايوب به بهتر اسپن آپشن طور پنهنجي جاءِ مضبوط ڪئي آهي، جڏهن ته ابرار احمد ۽ عثمان طارق اسپيشلسٽ اسپنر طور پاڻ مڃرايو آهي.
ان باوجود سلمان علي آغا ٽي ٽوئنٽي ورلڊ ڪپ لاءِ شاداب خان جي واپسي جي امڪان کي رد نه ڪيو.
ٽي ملڪي سيريز کٽڻ کانپوءِ پريس ڪانفرنس دوران سلمان علي آغا چيو ته شاداب بدقسمتي سان زخمي ٿيو، هو ٽيم جو نائب ڪپتان هو ۽ جڏهن توهان وٽ اهڙو رانديگر موجود هجي جيڪي ورلڊ ڪپ کيڏي چڪو هجي، ان وٽ تجربو هجي، بالنگ سان گڏ بيٽنگ به ڪري وڃي ۽ فٽ ٿي وڃي ته ظاهر آ ان جي واپسي ٿي سگهي ٿي.
هن چيو ته اسان وٽ نواز، صائم، ابرار ۽ عثمان جي صورت ۾ آپشن موجود آهن، اسان جو ڪم پاڪستان لاءِ بهترين اسڪواڊ ميدان ۾ لاهڻ آهي، جيڪڏهن پچون اسپنرن کي مدد ڏينديون ته توهان هڪ ميچ ۾ سڀني کي به ڏسي سگهو ٿا.
