ڪراچي (ويب ڊيسڪ) پ پ چيئرمين بلاول ڀٽو زرداري چيو آهي ته اين ايف سي ايوارڊ ۽ 18هين ترميم تحت صوبن کي ڏنل اختيارن ۽ آئيني ضمانتن کي ختم ڪرڻ جي ڪوشش باهه سان کيڏڻ جهڙي هوندي.
پ پ جي 58هين يوم ياسيس جي موقعي تي وڊيو لنڪ ذريعي خطاب ڪندي بلاول ڀٽو زرداري چيو ته ن ليگ اين ايف سي ايوارڊ جي حوالي سان صوبن جي مالي حقن ۾ تبديليون تجويز ڪيون هيون پر اسان مخالفت ڪئي، جنهن سبب اهي تجويزون 27هين آئيني ترميم جي حتمي مسودي جو حصو نه بڻجي سگهيون.
هن چيو ته ملڪ ۾ اڳ ئي گهڻيون ”فالٽ لائنز“ موجود آهن ۽ پ پ ماضي ۾ صوبن جي حقن، نمائندگي ۽ جمهوري نظام جي مضبوطي ذريعي انهن مسئلن کي حل ڪرڻ جي ڪوشش ڪئي آهي، جيڪي ماڻهو 18هين ترميم، اين ايف سي ايوارڊ يا اهڙي ڪنهن معاملي سان کيڏڻ جو سوچي رهيا آهن، اهي حقيقت ۾ باهه سان کيڏي رهيا آهن.
سندس چوڻ هو ته ڀارتي بچاءَ واري وزير جي سنڌ بابت بيان ۽ افغان سرحد تي وڌندڙ ڇڪتاڻ کي حڪومتي سطح تي ڏٺو پيو وڃي ۽ اهڙي ماحول ۾ ضروري آهي ته ملڪ ۾ اندروني اخلاف گهٽ رکيا وڃن ته جيئن ٻاهريون قوتون ان جو فائدو نه کڻن، متحد ٿي پاڪستان هر سازش ۽ دشمن جو مقابلو ڪرڻ جي صلاحيت رکي ٿو.
بلاول ڀٽو زرداري چيو ته پ پ انهن سڀني قدمن جي حمايت ڪندي، جيڪي وفاق کي مضبوط بڻائين پر اهڙي ڪنهن فيصلي جو حصو نه بڻجندي، جنهن سان صوبن جا حق ڪمزور ٿين.
27هين ترميم تحت قائم ڪيل وفاقي آئيني عدالت تي ڳالهائيندي هن چيو ته ڪجهه ڌريون ان نئين عدالت کي تڪراري بڻائڻ جي ڪوشش ڪري رهيون آهن پر اميد ته عدالت پنهنجي ڪردار ۽ فيصلن سان خدشا ختم ڪندي.
پ پ چيئرمين واضح ڪيو ته قانون سازي جو اختيار رڳو پارليامينٽ وٽ آهي، تنهن ڪري جيڪڏهن ڪو چاهي ٿو ته ترميم برقرار رهڻ يا نه رهڻ جو فيصلو ڪا عدالت ڪري ته اهو درست طريقو ناهي، اسان ڪنهن اداري کي پارليامينٽ جي ڪم ۾ مداخلت جي اجازت نه ڏينداسين.
