نئين دهلي (ويب ڊيسڪ) ڀارتي رياست مهاراشٽرا جي ضلعي نانديڙ ۾ هڪ نوجوان کي محبت جي ڏوهه ۾ بي درديءَ سان قتل ڪيو ويو، جنهن کانپوءِ ڇوڪريءَ ان جي لاش سان شادي ڪري سڀني کي دنگ ڪري ڇڏيو.
20 ورهين جي سڪشم نالي نوجوان جي گذريل ٽن سالن کان آنچل نالي ڇوڪريءَ سان محبت هئي، جيڪا ٻي ذات سان واسطو رکندڙ هئي.
ڀارتي ميڊيا موجب آنچل جا گهر ڀاتي مسلسل ان رشتي جي مخالفت ڪندا رهيا ۽ ٻنهي کي ڪيترائي ڀيرا ڌمڪيون به ڏنيون.
پوليس موجب جڏهن آنچل جي گهر ڀاتين کي خبر پئي ته ٻئي جلد شادي ڪرڻ وارا آهن ته انهن نوجوان کي تشدد جو نشانو بڻايو، پوءِ مٿي ۾ گولي هنئي ۽ پٿر سان مٿو چِٿي ڇڏيو.
ان افسوسناڪ واقعي جي ڪجهه ڪلاڪن کانپوءِ نوجوان جي آخري رسمن دوران اهڙو منظر ڏٺو ويو، جنهن سڄي علائقي کي اچرج ۾ وجهي ڇڏيو.
آنچل مُنهن مَٿو پِٽيندي سڪشم جي گهر پهتي، هن پنهنجي نرڙ تي سندور هنيو ۽ سڀني جي سامهون اعلان ڪيو ته سڪشم جي ”زال“ آهيان.
ڇوڪريءَ چيو ته اسان جي محبت کٽي وئي، سڪشم جي موت باوجود منهنجا گهر ڀاتي هارائي ويا.
هن چيو ته مان سڄي زندگي سڪشم جي گهر رهنديس ۽ ان جي زال طور زندگي گذارينديس، سڪشم جي قاتلن کي موت جي سزا ڏني وڃي.
پوليس قتل جي الزام ۾ 6 ڄڻن خلاف ڪيس داخل ڪري کين گرفتار ڪري ورتو.
