ممبئي (ويب ڊيسڪ) ڀارتي ڪرڪيٽ ٽيم جي اڳوڻي ڪپتان ۽ سينيئر بيٽر روهت شرما کي هدايت ڪئي وئي آهي ته هو پنهنجي مستقبل بابت هلندڙ افواهن تي تبصرن ڪرڻ بدران فٽنيس ۽ ڪارڪردگي تي ڌيان ڏئي.
ڀارت طرفان هڪ ڏينهن واري ڪرڪيٽ ۾ ٽئين نمبر تي سڀ کان وڌيڪ رنسون ٺاهيندڙ اوپننگ بيٽر جي آسٽريليا خلاف گذريل مهيني کيڏيل سيريز کان اڳ سندس مستقبل بابت سوال اُٿي رهيا هئا.
روهت آسٽريليا خلاف سيريز ۾ نه رڳو هڪ سينچري ۽ ففٽي اسڪور ڪئي پر ڇهه ڀيرا عالمي چيمپيئن رهندڙ ٽيم خلاف سڀ کان وڌيڪ رنسون اسڪور ڪرڻ تي پليئر آف دي سيريز جو ايوارڊ پڻ ماڻيو.
هاڻي روهت شرما ڏکڻ آفريڪا خلاف 30 نومبر کان شروع ٿيندڙ ٽن ون ڊي ميچن تي ٻڌل سيريز ۾ به ايڪشن ۾ نظر ايندو.
ڀارتي اخبار ٽائيمز آف انڊيا جي رپورٽ موجب، بي سي سي آءِ طرفان روهت شرما کي چيو ويو آهي ته هو پنهنجي مستقبل بابت هلندڙ افواهن تي تبصرن ڪرڻ بدران فٽنيس ۽ ڪارڪردگي تي ڌيان ڏئي.
بي سي سي آءِ ذريعن جو چوڻ آهي ته ڀارتي بورڊ روهت شرما کان سندس فطري جارحاڻي راند جي اميد رکي ٿو، جيڪا آسٽريليا خلاف سيريز ۾ نظر نه آئي هئي.
ذريعن موجب، آسٽريليا ۾ ڪنڊيشن ڏکي هئي پر نوٽ ڪيو ويو ته روهت شرما رسڪ وٺڻ کان پاسو ڪيو ۽ روهت ۽ ڪوهلي مان اها اميد رکي ويندي آهي ته ٻئي پنهنجي بيٽنگ سان ٻين نوجوان بيٽرز لاءِ آساني پيدا ڪن.
ڀارتي ميڊيا ۾ خبرون گردش ڪري رهيون آهن ته ڏکڻ آفريڪا خلاف سيريز کانپوءِ ڀارتي بورڊ ٽيم ۾ روهت شرما ۽ ويرات ڪوهلي جي شموليت بابت فيصلي لاءِ سليڪٽرز ۽ ٽيم مئنيجمينٽ سان صلاح مشورا ڪندو.
اهڙي صورتحال ۾ ڀارتي ڪرڪيٽ بورڊ جي ذريعن جو چوڻ آهي ته روهت شرما ۽ ويرات ڪوهلي جهڙن وڏن نالن بابت پوزيشن واضح ٿيڻ ضروري آهي ته انهن مان ڪهڙيون اميدون آهن ۽ موجوده ٽيم مئنيجمينٽ سندن ڪردار کي ڪهڙي ريت ڏسي ٿي، ڇو ته اهڙا رانديگر بي يقيني واري صورتحال ۾ صحيح نموني کيڏي نٿا سگهن.
