ڪيپ ٽائون (ويب ڊيسڪ) اڳوڻي ڏکڻ آفريڪي ڪپتان فاف ڊوپليسي آءِ پي ايل بدران پاڪستان سپر ليگ کيڏڻ جو فيصلو ڪيو آهي.
سوشل ميڊيا تي جاري بيان ۾ فاف ڊوپليسي اعلان ڪيو آهي ته هو آءِ پي ايل ۾ شرڪت نه ڪندو ۽ هڪ نئين چئلينج طور پاڪستان سپر ليگ ۾ کيڏڻ جو فيصلو ڪيو آهي.
فاف ڊوپليسي چيو آهي ته هن 14 سيزن کانپوءِ آءِ پي ايل نيلامي ۾ پنهنجو نالو نه ڏيڻ جو فيصلو ڪيو آهي.
هن چيو ته ”ڀارت مون کي انيڪ يادون، تجربو ۽ عزت ڏني ۽ هيءَ موڪلاڻي ناهي، مان وري موٽي ايندس.“
پي ايس ايل بابت فاف ڊوپليسي چيو ته هن سال هڪ نئين چئلينج قبول ڪرڻ جو فيصلو ڪيو آهي ۽ ايندڙ پي ايس ايل سيزن کيڏندس.
فاف جو چوڻ هو ته هي مون لاءِ هڪ پرجوش ۽ نئون سفر آهي، مون لاءِ ڪجهه نئون ڪرڻ جو موقعو آهي، پي ايس ايل اڻ ڳڻين صلاحيتن ۽ توانائي سان ڀرپور آهي.
هن چيو ته نئين ملڪ، نئين ماحول ۽ نئين ليگ جو تجربو ڪرڻ لاءِ پرجوش آهيان ۽ پاڪستان جي مهمان نوازيءَ لاءِ پڻ پرجوش آهيان، جلد ملنداسين.
واضح رهي ته 41 ورهين جي ڏکڻ آفريڪي بيٽر آءِ پي ايل جو آخري سيزن دهلي ڪيپيٽلز طرفان کيڏيو هو، جتي کيس ٻه ڪروڙ ڀارتي رپين ۾ خريد ڪيو ويو هو.
ان کان اڳ هو پاڪستان سپر ليگ ۾ ڪوئيٽا گليڊيئيٽرز ۽ پشاور زلمي جي نمائندگي ڪري چڪو آهي.
