اسلام آباد (بيورو) اسلام آباد ۾ سينيٽ جي اجلاس دوران عمران خان جي صحت بابت سوشل ميڊيا تي گردش ڪندڙ خبرن تي بحث ٿيو. پارلياماني معاملن جي وفاقي وزير طارق فضل چوڌري ايوان کي ٻڌايو ته هن اڊيالا جيل جي سپرنٽنڊنٽ سان ڳالهايو آهي، عمران خان مڪمل طور تي ٺيڪ آهي ۽ سندس صحت کي ڪو به خطرو ناهي. هن چيو ته عمران خان بابت غلط ۽ گمراهه ڪندڙ خبرون سوشل ميڊيا تي ٻاهرين ملڪن مان ڦهلائي رهيون آهن، جنهن کي ڀارتي ميڊيا به کنيو. پي ٽي آءِ ميمبرن عمران خان سان نه ملڻ تي سخت احتجاج ڪيو ۽ ايوان مان واڪ آئوٽ به ڪيو. سينيٽر علي ظفر چيو ته حڪومت جواب ڏيڻ کان پاسو ڪري رهي آهي، عوامي پريشاني وڌي رهي آهي. سينيٽر ذيشان خانزاده مطالبو ڪيو ته گذريل ٽن هفتن ۾ عمران خان سان ڪير مليو آهي. احتجاج سبب اجلاس پهرين 30 منٽن لاءِ ملتوي ڪيو ويو ۽ وقفي کان پوءِ به ايوان ۾ نعريبازي جاري رهي.
