ڪراچي(رپورٽر) سنڌ اسيمبليءَ پيپلز پارٽي جي 58هين يومِ تاسيس جي موقعي تي پارٽي جي باني شهيد ذوالفقار علي ڀٽو ۽ شهيد بينظير ڀٽو کي ڀرپور خراجِ تحسين پيش ڪندي 1973ع جي بحال ڪرايل آئين، 18هين ترميم، صوبائي خودمختياري ۽ اين ايف سي ايوارڊ ۾ صوبن جي حصي بابت ڪنهن به قسم جي سوديبازي نه ڪرڻ ۽ سنڌ جي وحدت، سلامتي ۽ حقن کي نقصان پهچائڻ واري هر سازش کي ناڪام بڻائڻ جي ٺهراءُ جمعي جي ڏينهن اتفاقِ راءِ سان منظور ڪري ورتي آھي۔جمعي واري ڏينهن سنڌ اسيمبلي جي اجلاس ۾ اھڙي قرارداد پيپلز پارٽي سنڌ جي صدر نثار احمد کھڙو پيش ڪئي، جنهن کي ايوان متفقه طور منظور ڪيو.اجلاس دوران پيپلز پارٽي سنڌ جي صدر نثار کھڙو اسپيڪر سيد اويس قادر شاهه کان قرارداد پيش ڪرڻ جي اجازت گهري، جنهن کان پوءِ قرارداد پيش ڪئي وئي. قرارداد جي متن موجب هي ايوان پاڪستان پيپلز پارٽي جي 58 هين يومِ تاسيس جي موقعي تي پارٽي جي باني ۽ پاڪستان جي اڳوڻي وزيراعظم شهيد ذوالفقار علي ڀٽو ۽ شهيد محترمه بينظير ڀٽو کي زبردست خراجِ عقيدت پيش ڪري ٿو، جن عوام، جمهوريت ۽ جمهوري قدرن جي خاطر پنهنجي جانين جو نذرانو پيش ڪيو ۽ آئين، قانون ۽ پارليمان جي بالادستي کي قائم رکندي ون مين ون ووٽ جي اصول ذريعي عوام کي اهو اختيار ڏنو ته قومي مستقبل جو فيصلو ڪرڻ جو حق رڳو عوام وٽ آهي ۽ ثابت ڪيو ته اصل طاقت جو سرچشمو عوام آهي. قرارداد ۾ چيو ويو ته شهيد ذوالفقار علي ڀٽو جمهوريت جي اصولن تي هلندي 30 نومبر 1967 تي لاهور ۾ پاڪستان پيپلز پارٽي جو بنياد رکيو ۽ "اٽو، لٽو ۽ اجهو” جو نعرو ڏنو ۽ ملڪ کي هڪ متفقه آئين ڏنو جنهن وفاق ۽ صوبن جي وچ ۾ اختيارن جو توازن واضح طور تي مقرر ڪيو. قرارداد ۾ وڌيڪ چيو ويو ته آصف علي زرداري ۽ چيئرمين بلاول ڀٽو زرداري جي قيادت ۾ پاڪستان پيپلز پارٽي پنهنجو منشور ۽ ورثو اڳتي وڌائي رهي آهي ۽ انهيءَ تي قائم آهي. قرارداد ۾ وڌيڪ چيو ويو ته آئين ۾ 18هين ترميم، صوبائي خودمختياري ۽ اين ايف سي ايوارڊ تحت صوبن جا حصا، سنڌ جي عوام جي حقن، وقار ۽ اتحاد جي بنيادي ضمانت آهن. قرارداد ۾ چيو ويو ته هي ايوان سنجيدگي ۽ عزم سان اهو ٻيهر اظهار ڪري ٿو ته 1973ع جي بحال ڪرايل آئين ، 18هين ترميم، صوبائي خودمختياري ۽ اين ايف سي ايوارڊ تحت صوبن جي حصي بابت ڪو به سمجهوتو نه ڪيو ويندو ۽ انهن جو تحفظ ڪيو ويندو. قرارداد ۾ چيو ويو ته هي ايوان پنهنجي پختي وابستگي جو اظهار ڪري ٿو ته سنڌ جي وحدت، سلامتي ۽ تاريخي حقن کي نقصان پهچائڻ يا ڪمزور ڪرڻ جي هر ڪوشش يا سازش کي ناڪام بڻايو ويندو. قرارداد تي اظهارِ خيال ڪندي پيپلز پارٽي سنڌ جي صدر نثار کھڙو چيو ته ڀٽو شهيد قوم کي متحد ڪرڻ لاءِ ملڪ ۾ پارٽي سسٽم رائج ڪيو ۽ ون مين ون ووٽ ذريعي عوام کي طاقت جو سرچشمو ثابت ڪيو، ۽ 1970ع جي چونڊن جي نتيجي ۾ غريب ۽ وچولي طبقي کي مضبوط ڪيو ويو. "روٽي، ڪپڙو ۽ مڪان” جي منشور تحت عوام کي روزگار ڏنو ويو. هن چيو ته اڄ به صدر آصف علي زرداري ۽ بلاول ڀٽو زرداري پارٽي جي منشور تي عمل پيرا آهن.نثار کھڙو چيو ته سنڌ کي الڳ ڪرڻ واري منفي سوچ کي 1970ع کان 2025ع تائين رد ڪيو آهي ۽ اڳتي به رد ڪيو ويندو. سنڌ جي اڳوڻي وڏي وزير سيد قائم علي شاهه خطاب ڪندي چيو ته ايوب خان جي ڊڪٽيٽرشپ واري دور ۾ عوام کي ڳالهائڻ جو حق نه هوندو هو، ان دوران ڀٽو شهيد جمهوريت جي قيام لاءِ ايوب خان ۽ يحيٰ خان جي ڊڪٽيٽرشپ جو مقابلو ڪيو، لاهور ۾ ڊاڪٽر مبشر جي گهر پارٽي جو بنياد رکيو ۽ منشور پيش ڪيو ۽ ملڪ کي 1973ع جو متفقه آئين ڏنو.پيپلز پارٽي جي ميمبر امداد پتافي چيو ته ملڪ ۽ جمهوريت لاءِ سڀ کان وڌيڪ قربانيون پيپلز پارٽي ڏنيون آهن. 25 سال تائين ملڪ ۾ آئين نه هو ۽ شهيد ڀٽو ملڪ کي متفقه آئين ڏنو ۽ پيپلز پارٽي جا ٻه وزيراعظم جمهوريت بچائيندي شهيد ٿيا. ميمبر اسيمبلي خيرالنساءُ مغل چيو ته شهيد ڀٽو عوام کي آواز ڏنو ۽ پيپلز پارٽي شهيد ڀٽو ۽ شهيد بينظير ڀٽو جي منشور کي اڳتي وڌائي رهي آهي.قرارداد تي اظهارِ خيال کان پوءِ منظوري لاءِ ايوان ۾ پيش ڪئي وئي ۽ ايوان نثار کھڙو جي قرارداد متفقه طور منظور ڪري ورتي، جڏهن ته اجلاس سومر ڏينھن منجهند تائين ملتوي ڪيو ويو.
