ممبئي (ويب ڊيسڪ) ڀارتي ليکڪ ۽ شاعر جاويد اختر ڀارت ۾ افغانستان جي طالبان حڪومت جي پرڏيهي وزير امير خان متقي جي شاندار آجيان تي ڇتي تنقيد ڪئي آهي.
افغانستان جي پرڏيهي وزير امير خان متقي اڄڪلهه ڀارت جي 6 ڏينهن جي دوري تي آهي، جيڪو طالبان حڪومت جي ڪنهن به اڳواڻ جو 2021ع ۾ اقتدار سنڀالڻ کانپوءِ ڀارت جو پهريون دورو آهي.
افغانستان جي پرڏيهي وزير مولوي امير خان متقي نئين دهلي ۾ ڀارتي هم منصب جئه شنڪر سان ملاقات ڪئي، جنهن دوران ڀارتي پرڏيهي وزير افغان پرڏيهي وزير کي ايمبولينسون تحفي طور ڏنيون.
ان کانسواءِ افغانستان جي پرڏيهي وزير امير خان متقي پنهنجي ڀارت جي دوري دوران اترپرديش ۾ مشهور ديني درسگاهه دارالعلوم ديوبند جو دورو پڻ ڪيو.
ڀارتي ليکڪ ۽ شاعر جاويد اختر افغان طالبان جي پرڏيهي وزير امير خان متقي کي ڀارت ۾ ڪيل آجيان تي سخت ردِعمل جو اظهار ڪيو آهي.
جاويد اختر سماجي رابطن جي ويب سائيٽ ايڪس تي جاري ڪيل بيان ۾ چيو ته ” افغان پرڏيهي وزير جو ڀارت ۾ آڌرڀاءُ ڏسي مون کي شرم محسوس ٿئي ٿو، منهنجو ڪنڌ شرم وچان جهڪي ويو آهي.“
جاويد اختر چيو ته ”منهنجو ڪنڌ شرم وچان جُهڪي ويو جڏهن مون ڏٺو ته طالبان جيڪو دنيا جو سڀ کان خطرناڪ دهشتگرد گروهه آهي، ان جي نمائندي جي ڪيئن عزت ۽ آجيان ڪئي پئي وڃي، اِهو به اهڙن ماڻهن جي طرفان جيڪي جيڪي هر قسم جي دهشتگردي خلاف تقريرون ڪندا آهن.“
هن دارالعلوم ديوبند تي به تنقيد ڪندي چيو ته ” شرم اچي ٿو دارالعلوم ديوبند وارن سندس جو آڌر ڀاءُ ڪيو، جن نياڻين جي تعليم تي مڪمل پابندي مڙهي ڇڏي آهي، ڀارتي ڀينرون ۽ ڀائرو ! هي اسان سان ڇا ٿي رهيو آهي؟ “
