اسلام آباد(ع آ نيوز) عالمي مالياتي اداري چيو آهي ته علائقائي ڇڪتاڻ ۾ ممڪن واڌارو معيشت لاءِ خطري جو باعث بڻجي سگهي ٿو، ۽ هلندڙ مالي سال جي پهرين چوٿائي ۾ لڳ ڀڳ 194 ارب رپين جي آمدني جي کوٽ پوري ڪرڻ لاءِ اضافي ٽيڪس لڳائڻ جي تجويز ڏني وئي آهي. پاڪستان ۽ آءِ ايم ايف جي وچ ۾ ٻئي معاشي جائزي جي حوالي سان پاليسي سطح تي ڳالهيون آخري مرحلي ۾ داخل ٿي ويون آهن، ۽ ٻنهي ڌرين جي وچ ۾ ميمورنڊم آف اڪنامڪ اينڊ فنانشل پاليسيز (MEFP) جي مسودي کي آخري شڪل ڏيڻ تي مشاورت جاري آهي.ذريعن موجب ناڻي واري وفاقي سيڪريٽري جي سربراهي ۾ معاشي ٽيم آءِ ايم ايف مشن سان ملاقات ڪئي آهي، ۽ وفاقي وزير خزانو محمد اورنگزيب جي به ملاقات متوقع آهي. انهن ڳالهين ۾ *ميمورنڊم آف اڪنامڪ اينڊ فنانشل پاليسيز* جي مسودي کي حتمي شڪل ڏيڻ تي غور ڪيو ويو.ذريعن ٻڌايو ته ايف بي آر طرفان ميمبر ڪسٽمز پاليسي سميت ٻيا عملدار به آءِ ايم ايف مشن سان ڳالهين ۾ شامل آهن. مزيد ٻڌايو ويو ته هلندڙ مالي سال جي ٽيڪس هدفن ۽ ٽيڪس نيٽ وڌائڻ لاءِ قدمن تي به ڳالهيون ٿيون. ان دوران آءِ ايم ايف آمدني جي کوٽ پوري ڪرڻ لاءِ اضافي ٽيڪس لاڳو ڪرڻ جي تجويز ڏني، پر هن مهل تائين انهيءَ تي اتفاق ناهي ٿيو. حڪومتي ٽيم چيو ته ٽيڪس تڪرارن ۾ ڦاٿل اربين رپين جي واجب الادا رقم جي وصولي آمدني جي کوٽ کي گهٽ ڪرڻ ۾ مدد ڏيندي، جڏهن ته انتظامي ۽ انفورسمينٽ قدمن ذريعي به اضافي آمدني گڏ ڪئي ويندي. ٻئي طرف، آءِ ايم ايف اها تجويز ڏني آهي ته آمدني جي کوٽ پوري ڪرڻ لاءِ ڪجهه شعبن تي نوان ٽيڪس لاڳو ڪيا وڃن ۽ ڪجهه تي لاڳو ٿيل رعايتي ٽيڪس جي شرح ختم ڪري معياري ٽيڪس لاڳو ڪيو وڃي. شوگر سيڪٽر جي ڊيريگوليشن جو مقصد کنڊ جي صنعت تي حڪومت جو ڪنٽرول گهٽائڻ آهي ته جيئن مارڪيٽ پاڻ قيمت ۽ پيداوار جو تعين ڪري. آٽو پاليسي ذريعي گاڏين جي پيداوار، قيمتن ۽ ٽي رف جو تعين ڪيو ويندو. ذريعن موجب، آءِ ايم ايف سان جاري پاليسي سطح جي ڳالهين جي ڪامياب مڪمل ٿيڻ لاءِ وفاقي حڪومت صوبائي حڪومتن تي به زور ڏنو آهي ته اهي آءِ ايم ايف سان لاڳاپيل پنهنجا التوا هيٺ معاملا جلد کان جلد حل ڪن، ته جيئن 7 ارب ڊالر جي توسيعي مالياتي معاهدي جي ٻئي جائزي تي جاري ڳالهيون هفتي جي پڄاڻي تائين ڪاميابي سان مڪمل ٿي سگهن. ذريعن موجب، وزيراعظم آفيس طرفان به صوبائي راڄڌانين ۾ موجود وفاقي آفيسرن سان رابطو ڪري هدايت ڪئي وئي آهي ته اهي التوا هيٺ معاملن ۽ مستقبل جي هدفن بابت آءِ ايم ايف سان ڪيل واعدن مطابق اڳڀرائي کي يقيني بڻائين. صوبائي چيف سيڪريٽريز ۽ فنانس سيڪريٽريز کي هدايت ڪئي وئي آهي ته اهي 24 ڪلاڪن اندر پنهنجون تازي رپورٽون جمع ڪرائن ۽ ڪنهن به هدف جي پوري نه ٿيڻ يا دير جي واضح سببن بابت وضاحت ڪن.ذريعن موجب، آءِ ايم ايف علائقائي ڇڪتاڻ ۾ واڌ کي معيشت لاءِ خطرو قرار ڏنو آهي ۽ چيو آهي ته ڇڪتاڻ وڌڻ سان اقتصادي واڌ جي رفتار سست ٿي سگهي ٿي.
