ڊيلاس (ويب ڊيسڪ) ڏکڻ آفريڪي ٽيم جي اڳوڻي ڪپتان ۽ بيٽر فاف ڊوپليسي ٽي ٽوئنٽي ڪرڪيٽ ۾ پاڪستان جي تجربيڪار بيٽر بابر اعظم جو اهم رڪارڊ ٽوڙي ڇڏيو.
آمريڪي جي ميجر ليگ ( ايم ايل سي ) جي 21 هين ميچ ۾ ٽيڪساس سپر ڪنگز ۽ ايم آءِ نيويارڪ وچ ۾ سخت مقابلو ٿيو، ڏکڻ آفريڪي بيٽر فاف ڊوپليسي ٽيڪساس سپر ڪنگز طرفان شاندار اننگز کيڏندي ٽي ٽوئنٽي ڪرڪيٽ جي تاريخ ۾ ڪيئي رڪارڊ جوڙي ڇڏيا.
ڊوپليسي اهم ميچ ۾ رڳو 53 بالن تي 103 رنسون جي ڌماڪيدار اننگز کيڏي جنهن ۾ پنج چوڪا ۽ نوَ ڇڪا شامل هئا.
هن ٽورنامينٽ جي هلندڙ سيزن ۾ ٻي سينچري اسڪور ڪئي، ان کان اڳ هن سان فرانسسڪو يوني ڪارنز خلاف به سينچري ٺاهي هئي.
ان اننگز سان گڏ ئي ڊوپليسي چاليهه ورهين جي عمر ۾ ٽي ٽوئنٽي جي تاريخ ۾ ٻه سينچريون ٺاهيندڙ پهريون بيٽر بڻيو، جڏهن ته مختصر فارميٽ ۾ سڀ کان وڌيڪ سينچريون ٺاهيندڙ ڪپتان پڻ بڻجي ويو جنهن هنيئر تائين مجموعي طور تي اٺ سينچريون اسڪور ڪيون آهن.
ان فهرست ۾ پاڪستان جو بابر اعظم ٻئي نمبر تي آهي جنهن ڪپتان طور ست سينچريون ٺاهيون، بابر اعظم قومي ٽيم، ڪراچي ڪنگز ۽ پشاور زلمي جي ڪپتاني ڪري چڪو آهي ۽ هينئر تائين 144 ميچن ۾ ڪپتان جي حيثيت سان 5200 کان وڌيڪ رنسون ٺاهي چڪوآهي.
ان فهرست ۾ ٽيون نالو اڳوڻي آسٽريلوي بيٽر مائيڪل ڪلنگر جو به آهي جنهن ڪپتان طور ست سينچريون ٺاهيون، جڏهن ته ويرات ڪوهلي چئن سينچرين سان چوٿين نمبر تي موجود آهي.
