نيويارڪ(رضا رومي)ناليواري ليکڪه ڊاڪٽر عائشه صديقا چيو آهي ته اسٽيبلشمينٽ پ پ ۽ ن ليگ سان گڏجي پيڪا جو انڌو قانون ٺهرايو آهي،گذريل ڏينهن نصرت جاويد به گوڙ ڪري رهيو هو ته پيڪا جو قانون رڳو سوشل ميڊيا تي لاڳو نه پيو ٿئي اهو پرنٽ ۽ اليڪٽرانڪ ميڊيا خلاف وڌيڪ استعمال ٿي رهيو آهي،هڪ وي لاگ ۾ ڳالهائيندي هن چيو ته هاڻي ته انويسٽيگيشن به مري وئي آهي،توهان جي اخبار يا ٽي وي ۾ هليل خبر سوشل ميڊيا تي وائرل ٿئي ٿي ته پيڪا جو قانون حرڪت ۾ اچي وڃي ٿو،هن چيو ته اسان جي ملڪ ۾ هاڻي ڪا پوليٽيڪل فورس ناهي رهي،پهرين سياستدان آواز اٿاريندا هئا،هاڻي ته عدليه ۽ سياست ٻنهي جو وجود ناهي رهيو،گذريل ڏينهن ٽوئيٽر تي ڪنهن ٽوئيٽ ڪئي ته بينظير ڀٽو ۽ نوازشريف زنده هجن ها ته اڄ هي حالتون نه هجن ها،هن چيو ته بينظير ڀٽو کي ته شهيد ڪيو ويو پر نوازشريف زندهه هوندي به ڪجهه نه پيو ڪري،ڪير مداخلت ڪندو؟ هن وقت اسٽيبلشمينٽ جو جيڪو سربراهه آهي ته اهو ته رياست کي سخت گير بڻائي رهيو آهي،هاڻي صحافين جو آواز ڪير ٻڌندو؟ وزيراعظم پنهنجو گهرو وزير نٿو لڳائي سگهي اهو اسٽيبلشمينٽ کي ڪهڙو ڪنٽرول ڪندو؟پاڪستان جي تاريخ ۾ سياسي پارٽيون ايتريون مرده ڪڏهن به نه هيون جيڪي هن وقت آهن،نوازشريف جو پراڻو رڪارڊ تمام سٺو رهيو آهي،هن پنهنجي ڌيءُ کي وزيراعليٰ ۽ ڀاءُ کي وزيراعظم بڻائي ڇڏيو آهي،هاڻي خاموش آهي،پي ٽي آءِ گهٽ ۾ گهٽ مزاحمت ته ڪري رهي آهي، پ پ ۽ ن ليگ وارا آقا آڏو چپ ڪري ويٺل آهن،هن چيو ته هائبرڊ نظام نوازشريف جي 2013ع واري حڪومت کان شروع ٿيو،عمران خان جي حڪومت ان جو ٻيو مرحلو هئي.
نوٽ: هي تجزيو، روزاني عوامي آواز، ڇنڇر 29 مارچ 2025ع تي شايع ٿيو
