بدين/ٻڍوقمبراڻي/ڊگھڙي(نمائندن وٽان) سنڌو درياھ تي ڌاڙي، 6 ڪئنال ۽ ڪارپوريٽ فارمنگ خلاف ٻڍوقمبراڻي ۾ قومي عوامي تحريڪ جي سربراھ اياز لطيف پليجو جي اڳواڻي ۾ ھزارين ماڻهن ڊگھڙي روڊ کان پيادل مارچ ڪري شھر جو گشت ڪرڻ بعد مين بس اسٽاپ وٽ جلسي عام ڪيو ويو. ٻڍو قمبراڻي پھچڻ تي شھرين اياز لطيف پليجي کي اجرڪون پرائي گلن جي ورکا ڪري شاندار استقبال ڪيو ويو. مارچ ۾ ھزارين ماڻھو درياھ خاطر جھيڙو آ، سنڌو خاطر جھيڙو آ، ڪئنال نامنظور جي سخت نعريبازي ڪري رھيا ھئا. پيادل مارچ ۾ سنڌي ھاري تحريڪ جو مرڪزي آرگنائيزر ڪرڙ ريٻاري، نثار ڀرڳڙي، شوڪت نوحاڻي،ارباب نوحاڻي، الطاف ڀرڳڙي، بابو نوحاڻي ۽ ٻيا شامل ھئا. جلسي کي خطاب ڪندي اياز لطيف پليجي چيو ته رئيس وڏا غلطي پيا ڪيو، ته ٻيڙي به جهان خان ٻوڙيندو ۽ انصاف به جهان خان ڪندو. وفاقي حڪومت پيپلزپارٽي جي ووٽن سان بيٺي آهي، وري ڪئنالن جي خلاف احتجاج به اهي ٿا ڪن، پيپلزپارٽي ٻيڙو ٻوڙڻ کانپوءِ جهان خان ٿيڻ جي ڪوشش نه ڪري. هن چيو ته جي ذرو به عقل اٿو، ته سنڌين جي اکين ۾ بي انتھا ڪاوڙ کي ڏسي وٺو، سنڌين جي نعرن ۾ مزاحمت جي گجگوڙ کي سمجھي وٺو. ھي سنڌ جو شعور اوھان کي پاڻيءَ تي ڌاڙو ڪو نه ھڻڻ ڏيندو ۽ ھي اھو سنڌ جو شعور آھي جيڪو اوھان سان مزاحمت ڪندو. هن چيو ته جمھوريت جي نالي ۾ بدترين آمريت آھي. سنڌ کي ديوار سان لڳايو پيو وڃي. آصف زرداري ايوان صدر ۾ ويھي سنڌو درياھ ۽ وسيلا کپائي رھيو آھي. درياھ ھليو ويو ته 30 سالن کانپوءِ سنڌ صوماليا ۽ ايٿوپيا بنجي ويندي. انڊس رور سسٽم ۾ ضرورت جيترو پاڻي ناھي. چولستان ڪئنال ناھي، سنڌو درياھ جو رخ تبديل ڪرڻ جو منصوبو آھي.ڪارپوريٽ فارمنگ جي نالي ۾ لکين ايڪڙ زمين تي قبضا ڪيا پيا وڃن. هن چيو ته آصف زرداري ۽ شھباز شريف ضيا کان وڌيڪ طاقتور نه آھن ملڪ برابري جي بنياد تي ھلندو آھي انصاف ء برابري ساڳي ھجڻ کپي پر ھتي ان جي ابتڙ ٿي رھيو آھي ٽن صوبن کي ريگستان ڪرڻ چاھين ٿا ھڪ پنجاب کي سر سبز ڏسڻ چاھين ٿا ڊبل پاليسي نه ھلڻ ڏينداسين
