اسلام آباد(بيورو رپورٽ) فري اينڊ فيئر اليڪشن نيٽ ورڪ (FAFN) موجوده پارليامينٽ جي 12 هين اجلاس ۾ اسيمبلي ميمبرن جي پهرين سال جي حاضري جي ڪارڪردگي تي جائزي جي رپورٽ جاري ڪري ڇڏي آهي. رپورٽ موجب 13 کان 23 جنوري 2025 تائين ايوان جو اجلاس ٿيو جنهن ۾ ايوان جا 9 سيشن ٿيا جنهن ۾ صرف 36 ميمبرن شرڪت ڪئي جڏهن ته 35 ميمبرن ڪنهن به اجلاس ۾ شرڪت نه ڪئي. فافن پنهنجي جائزي رپورٽ ۾ چيو ته اجلاس جي 9 هين سيشن ۾ سڀ کان وڌيڪ 241 (68 سيڪڙو) ميمبرن جي حاضري هئي، سيشن جي پنجين ويهڪ ۾ سڀ کان گهٽ حاضري 117 (37 سيڪڙو) ميمبرن جي هئي جڏهن ته 277 ميمبرن (82 سيڪڙو) گهٽ ۾ گهٽ هڪ اجلاس ۾ شرڪت نه ڪئي. رپورٽ موجب 9 مان 8 سيشن ۾ عورتن جي حاضري مرد ميمبرن جي ڀيٽ ۾ وڌيڪ هئي، 96 ايم اين ايز موڪلن تي هئا، 181 ميمبر رسمي درخواست کانسواءِ نه آيا. رپورٽ ۾ چيو ويو آهي ته مسلم ليگ (ن)، سني اتحاد ڪائونسل، پيپلز پارٽي جي اڪثريتي ميمبرن اڌ کان وڌيڪ ويهڪن ۾ شرڪت ڪئي، مسلم ليگ (ن) جي 13 سيڪڙو، سني اتحاد ڪائونسل جي 8 سيڪڙو، پيپلز پارٽي جي 11 سيڪڙو ميمبرن 100 سيڪڙو شرڪت ڪئي. وزيراعظم صرف ٻن اجلاسن ۾ آيو. سوالن جوابن جي ويهڪن ۾ به وزيرن جي دلچسپي نه رهي، صرف ڇهه وزيرن گهڻي شرڪت ڪئي. هائوسنگ وارو وزير سمورن اجلاسن ۾ آيو.
