حيدرآباد(رپورٽر) حيدرآباد پوليس ۽ وڪيلن وچ ۾ پيدا ٿيل ڇڪتاڻ اڃان تائين برقرار آهي، ڪالهه حيدرآباد پريس ڪلب سامهون اسلام آباد ۾ وڪيلن جي رستا روڪ ڪرڻ خلاف احتجاجي مظاهري لاءِ پهتل وڪيلن حيدرآباد پريس ڪلب ۽ ان جي ڀرپاسي جي ڀتن تي بدلي ٿيل ايس ايس پي فرخ لنجار جي حمايت ۾ لڳل بينر پٽي روڊ تي اڇلائي ڇڏيا، ان دوران وڪيل بدلي ٿيل ايس ايس پي فرخ لنجار خلاف نعريبازي ڪري رهيا هئا، وڪيلن پاران روڊ تي اڇلايل بينرن کي روڊ تان گذرندڙ گاڏيون لتاڙينديون رهيون، اڌ ڪلاڪ تائين ايس ايس پي جي فوٽو وارن بينرن کي گاڏين جي لتاڙڻ واري عمل کان پوءِ وڪيلن جي احتجاجي مظاهري ختم ٿيڻ بعد ڪينٽ ٿاڻي جي ايس ايڇ او پنهنجي نفري سان گڏ پهچي روڊ تان کڻائي پنهنجي جاءِ تي ٻيهر لڳرائي ڇڏيا،هوڏانهن حيدرآباد جي نامياري وڪيل امتياز احمد ابڙو بدلي ٿيل ايس ايس پي فرخ لنجار جي حمايت ۾ حيدرآباد شهر ۾ لڳل پوسٽرن ۽ بينرن خلاف ڪارروائي لاءِ ڊپٽي ڪمشنر حيدرآباد کي درخواست ڏئي ڇڏي آهي، درخواست ۾ چيو ويو آهي ته حيدرآباد شهر جي مختلف هنڌن تي بدلي ٿيل ايس ايس پي جي حمايت ۾ پوسٽر ۽ بينرز غير مجاز نمائش طور لڳايا ويا آهن، اهڙا پوسٽر ۽ بينر نه رڳو شهر جي ماحول کي خراب ڪن ٿا، پر غير ضروري عوامي بيچيني جو به سبب بڻجي سگهن ٿا، تنهن ڪري، مان توهان کي درخواست ڪريان ٿو ته توهان فوري طور تي هن عمل خلاف قدم کڻو هوڏانهن ڊسٽرڪٽ بار ايسوسيئيشن حيدرآباد جي جنرل سيڪريٽري ايڊووڪيٽ شاڪر نواز حيدرآباد پريس ڪلب سامهون بدلي ٿيل ايس ايس پي فرخ لنجار جا لڳل بينر ڦاڙڻ واري عمل جي مذمت ڪندي چيو آهي ته اهو عمل هڪ سازش تحت ڪيو ويو آهي، جنهن سان اسان وڪيلن کي بدنام ڪرڻ جي سازش ڪئي پئي وڃي، اهڙي عمل جي مذمت ڪريون ٿا.
هاءِ ڪورٽ بار حيدرآباد پاران فرخ لنجار اڻوڻندڙ قرار، ٺهراءُ منظور
حيدرآباد ( رپورٽر) ھاءِ ڪورٽ بار، ايس ايس پي ڊاڪٽر فرخ لنجار کي اڻوڻندڙ شخص قرار ڏيندي کيس ٻيھر حيدرآباد ۾ مقرري ۽ ھاءٍِ ڪورٽ بار ۾ داخل ٿيڻ تي پابندي ھڻڻ جي قرارداد منظور ڪري ورتي آهي، ھاءِ ڪورٽ بار ايسوسيئيشن حيدرآباد جي نائب صدر حميد الله ڏاھري، جنرل سيڪريٽريءَ عرفان علي ٻگھيو، جوائنٽ سيڪريٽري مرتضيٰ شيخ، خزانچي ممتاز سچل اعواڻ جي صحي سان جاري ڪيل نوٽيفڪيشن ۾ موقف اختيار ڪيو ويو آھي ته وڪيل سدائين قانون جي حڪمراني، عدليه جي آزادي، آئين جي بالادستي ۽ انساني حقن جي تحفظ، بشمول قانوني پيشه ور ماڻهن جي حقن ۽ عزت جي حفاظت ۾ پختو عزم رکندا آهن، ان پس منظر ۾ هاءِ ڪورٽ بارايسوسيئيشن حيدرآباد جي مينيجمينٽ ڪميٽي جو هڪ هنگامي اجلاس طلب ڪيو ويوهاءِ ڪورٽ بار جو مطالبو آهي ته ڊاڪٽر فرخ لنجار کي ڪڏهن به حيدرآباد ۾ ٻيهر پوسٽ تي مقرر نه ڪيو وڃي، ايسوسيئيشن لاڳاپيل اختيارين کي اپيل ڪري ٿي ته هن کي حيدرآباد جي دائري ۾ ڪا به سرڪاري ذميواري نه سونپي وڃي، هاءِ ڪورٽ بار ان عظم جو اظھار ڪري ٿي ته آئين جي بالادستي ۽ قانون جي حڪمراني ۽ انساني حقن لاءِ پنھنجو ڪردار ادا ڪندي رھندي 17
