لاهور (ويب ڊيسڪ) نيوزيلينڊ ڪرڪيٽ ٽيم جي اڳوڻي آل رائونڊر ۽ موجوده بالنگ ڪوچ جيڪب اورم چيمپيئنز ٽرافي جي هائبرڊ ماڊل بابت سوال جو جواب ڏيڻ کان لنوائي ويو.
لاهور ۾ ميڊيا سان ڳالهائيندي، جيڪب اورم چيو ته ڊگهي سفر کانپوءِ پاڪستان پهتا آهيون ۽ ٽيم ٽريننگ لاءِ پُرجوش آهي.
جيڪب اورم چيو ته هنن اهڙين حالتن ۾ گهڻي ڪرڪيٽ کيڏي آهي، اهي حالتون نيون ناهن، رانديگر اهڙين حالتن ۾ کيڏڻ جا عادي آهن.
سندس چوڻ هو ته ٽه ملڪي سيريز جو چيمپيئنز ٽرافي کان اڳ ٿيڻ سٺو سنئوڻ آهي ۽ اهم ڳالهه اها آهي ته پاڪستان خلاف به کيڏڻ جو موقعو ملي رهيو آهي.
اورم چيو ته ٽه ملڪي سيريز بابت حڪمت عملي ٺاهي وئي آهي، هن وقت هاڪاري موڊ ۾ آهيون، پاڪستان خلاف گهڻو کيڏي چڪا آهيون، سيريز چيمپيئنز ٽرافي جي تيارين ۾ مددگار ثابت ٿيندي.
ڪيوي آل رائونڊر ماضي کي ياد ڪندي چيو ته هو 20 سالن کان پوءِ پاڪستان آيو آهي، ۽ ٻن ڏهاڪن کان پوءِ هتي اچي سٺو محسوس ڪري رهيو آهي.
نيوزيلينڊ جي فاسٽ بالنگ ڪوچ هڪ سوال جي جواب ۾ چيو ”ڇا مان هائبرڊ ماڊل مان خوش آهيان؟ اوهان مون کان اهو سوال پڇيو آهي، مان ان معاملي تي جواب ڏيڻ جي پوزيشن ۾ نه آهيان.“
هن چيو ته اسان کي جيڪو ٻڌايو ويو آهي ائين ڪنداسين، چيمپيئنز ٽرافي ۾ پاڪستان ۽ بنگلاديش سان پاڪستان ۾ کيڏنداسين، جڏهن ته ڀارت خلاف دبئي ۾ ميچ آهي.
هن چيو ته چيمپيئنز ٽرافي جي خوبصورتي اها آهي ته هر ٽيم وٽ برابري جو موقعو آهي، ڪا به ٽيم ڪنهن کي به هارائي سگهي ٿي.
