سکر (رپورٽ: آزاد مهر) سکر ۾ اينٽي ڪينال ايڪشن ڪاميٽي پاران سنڌو درياهه تي 6 ڪينال اڏڻ خلاف لب مهراڻ کان احتجاجي ريلي ڪڍي وئي، احتجاجي ريلي جي اڳواڻي سنڌ آبادگار اتحاد جو صدر نواب زبير ٽالپر، ايس يو پي سربراهه سيد زين شاهه، اسٽيپ فائونڊيشن جي چيئرپرسن ميڊم شائستا کوسو ۽ ٻيا ڪري رهيا هئا. احتجاجي ريلي ۾ سنڌ جي مختلف علائقن کان ھزارين آبادگارن شرڪت ڪئي. اڳواڻن خطاب ڪندي چيو ته 6 نون ڪينالن جو منصوبو سنڌ ۾ ڏڪار آڻڻ جي سازش آهي، پنجاب جا حڪمران گذريل يڍ صدي کان سنڌ جي پاڻي تي ڌاڙا هڻي رهيا آهن، سنڌ کي سنڌ جي حصي جو پاڻي گهرجي، هنن چيو ته ساليانو 184 ارب ڪيوبڪ کان وڌيڪ سنڌ جو پاڻي پنجاب چوري ڪري رهيو آهي، ارسا ايڪٽ ۾ ترميم ڪري سنڌو جو پاڻي غير مُلڪي ڪمپنين کي وڪرو ڪيو ويندو، ارسا 3 رخي فارمولي تحت پاڻي ورهاست ڪري ۽ آئين کان مٿانهون فيصلو نه ڪري. هنن چيو ته سنڌو درياهه تي 6 ڪينال اسان کي ڪنهن به صورت ۾ قبول نه آهن، سنڌو درياءُ تي 6 ڪينال اڏڻ سنڌ جي آبادگارن جو معاشي قتل ڪرڻ آهي جنهن سان سنڌ جون لکين ايڪڙ زرعي زمينون غير آباد ٿي بڻجر بڻجي ويندي.
