ڪراچي(رپورٽ: ذوالفقار راڄپر) نامور صحافين ،سول سوسائٽي جي اڳواڻن ۽ اديبن سنڌي انگريزي ٻولي جي صحافي ۽ ليکڪ انور پيرزادو کي سنڌ جي جهرجهنگ سان محبت ڪندڙ سيلاني، شاھ لطيف جو پارکو، محقق، اينٿراپالاجسٽ، شاعر، ڪهاڻيڪار، اديب ،جاکوڙي ترقي پسند صحافي قرار ڏيندي انور پيرزادو اڪيڊمي کي سلام پيش ڪندي سنڌ جي اشاعتي ادارن کي صلاح ڏني آهي ته انور پيرزادو جي لکيل انگريزي، سنڌي ڪتابن کي اردو ٻوليءَ ۾ شايع ڪرايا وڃن. اها ڳالهه ڪالهه شام جو ادبي ڪميٽي ڪراچي پريس ۽ انور پيرزادو اڪيڊمي طرفان ڪراچي پريس ڪلب ۾ انور پيرزادو جي ارڙهين ورسي جي تقريب ۾ ڪئي وئي. ان موقعي تي اڳوڻي سينٽر ڊاڪٽر ڪريم خواجا ڳالهائيندي چيو ته انور پيرزادو سنڌ جي جبلن، ماڳن مڪانن ۽ موهن جي دڙي جي کنڊرن جي ڀرندڙ حالتن کان مڪمل واقفيت رکندو هو ۽ کيس زندگي مهلت ڏي ها ته هو اڃان گهڻو ڪجهه لکي وڃي ها ۽ هن ڪڏهن به ڪينسر جي مرض کي پاڻ مٿان حاوي ٿيڻ نه ڏنو، سول سوسائٽي جي اڳواڻ ۽ ليکڪ اعجاز قريشي چيو ته انور سنڌ جي هر ڪنڊ، آباد ۽ ويران رستن علائقن سان محبت ڪندڙ سمجهدار ليکڪ هو، جنهن جي ڪتابن کي سرڪاري ۽ خانگي ادارن کي اردو ۾ شايع ڪرڻ گهرجي. لنڊن کان آيل بي بي سي جي نمائندي جاويد سومرو چيو ته انور پيرزادو صحافت ۾ ايندڙ نوجوانن کي همٿائيندو هو، هن سنڌ جي ميربحرن، پورهيتن، ٿر، ڪاڇي، پاڻي وغيرهه تي تاريخي ڪم ڪري ان کي انگريزي صحافت ۾ ملڪ اندر روشناس ڪرائي سنڌ ڏانهن انهن جو ڌيان ڇڪايو، پنجاب مان آيل سول سوسائٽي جي اڳواڻ حارث خليق چيو ته انور پيرزادو پاڪستان جي فوج ۾ هوندي بنگالين جي آزادي جي تحريڪ خلاف وڙهڻ کان انڪار ڪري جيل جون تڪليفون برداشت ڪيون، جيڪو عمل ان جي مزاحمت جي ابتدا هئي، هو هڪ پڙهيل لکيل ترقي پسند صحافي هو، جنهن جهڙا صحافي هاڻي نظر نه ٿا اچن، هن سنڌ جي ماحوليات سميت هر مسئلي ۽ موضوع تي ڪم ڪيو ۽ رپورٽنگ ڪئي، صحافي مظهر عباس چيو ته انور پيرزادو ايم آر ڊي تحريڪ بعد سنڌي صحافت کي نئين رنگ روپ طرف موڙي ڇڏيو ۽ هن جي انگريزي ۾ ڪيل صحافت ۽ لکڻين تي پنجاب مان به فونون اينديون هيون، عورتن جي حقن جي اڳواڻ مہناز رحمان چيو ته انور پيرزادو پنهنجي جواني واري شخصيت ۾ پنهنجي ڪم ۽ سونهن ڪري هر مرد ۽ عورت کي پاڻ ڏانهن مائل ڪندو هو، هو سنڌ ۾ رهي سنڌ جي لاءِ هر ويڙهه ۾ متحرڪ رهيو. ان موقعي تي شاعر امر پيرزادو سول سوسائٽي جي اڳواڻ ذوالفقار هاليپوٽو، شاعره سنڌو پيرزادو، مهيش ڪمار، عاجز جمالي، سبينا شهباز، ياسمين قاضي، زبير پيرزادو، زين پيرزادو ۽ ٻين ڳالهائيندي چيو ته نوجوانن کي خبرن ٺاهڻ، سيکارڻ جهڙا اخباري ايڊيٽر موجود نه آهن، هن وٽ صحافتي انٽرويو ڪرڻ جو الڳ فن موجود هو، هو انقلابي ۽ عوامي صحافي، ليکڪ، محقق ۽ شاعر هو،هنن چيو ته هو پنهنجي طبيعت ۾ سيلاني، مزاحمت ۽ پيار جو به شاعر هو، هو فقير ۽ امير سان ويهڻ جو فن ڄاڻيندو هو، هن جي لکڻين وانگر هن جي شخصيت ۾ به سحر هوندو هو. تقريب ۾ زرار پيرزادو، جاويد مهر، ، سارنگ زين ، صوفيه، رياض پيرزادو، قاضي اعجاز، پرويز پيرزادو، ناشا، خالدہ زلف پيرزادو، انم ۽ ٻين شرڪت ڪئي.
