حيدرآباد(رپورٽر) حيدرآباد وومين جيل جي اھلڪار توفيق احمد شاھه 4 مهينن کان پگھار بند ٿيڻ خلاف احتجاجن پنهنجي ٽن معصوم نياڻين 12 ورهين جي مريم 10 ورهين جي نجمان ۽ 5 ورهين جي زهره کي ساڻ ڪري حيدرآباد پريس ڪلب پهچي احتجاجن نياڻين جي وڪري جا هوڪا ڏنا، جنهن دوران هو "ٻار وٺو ٻار وٺو” جا پڙها ڏيندو رهيو، ان موقعي اهلڪار توفيق شاھه ٻڌايو ته وومين جيل حيدرآباد ۾ ڊرائيور آهيان، 20 سالن کان ايمانداري سان ڊيوٽي ڪري رهيو آهيان، جيل سپرنٽيننڊنٽ عابدا سميع عباسي ڊيوٽي تان غير حاضر رھڻ جو جواز ڄاڻاڻي 4 مھينن کان پگھار بند ڪري ڇڏي آهي، پگهار نه ملڻ سبب گهر ۾ فاڪا ڪشي واري صورتحال آهي، ننڍڙن ٻچن کي ٻن ويلن جي ماني به نٿو کارائي سگھان. پگهار جاري ڪرائڻ لاءِ ڪيترائي ڀيرا لاڳاپيل آفيسرن آڏو دانهون ڪيون پر ڪير ٻڌڻ وارو ناهي. جنهن ڪري مجبور ٿي پنهنجين نياڻين کي وڪرو ڪرڻ لاءِ آيو آهيان. ٻارڙن جي قيمت ٽن ويلن جي ماني کارائڻ رکي آهي، ٻئي طرف وڏي وزير سيد مراد علي شاهه معاملي جو نوٽيس وٺندي جيل کاتي جي صوبائي وزير علي حسن زرداري کان رپورٽ طلب ڪري ورتي آهي ۽ سوال ڪيو آهي ته پوليس اهلڪار جي پگهار ڇو بند ٿي آهي؟ ان بابت رپورٽ ڏني وڃي، پوليس اهلڪار پاران مجبورن نياڻيون وڪرو ڪرڻ وارو معاملو انتهائي ڳڻتي جوڳو آهي. وڏي وزير ڊي آءِ جي جيل کي هدايت ڪئي ته متاثر اهلڪار جي جائز پگهار وارو مسئلو حل ڪيو وڃي.
