ممبئي (ويب ڊيسڪ) نيوزيلينڊ ممبئي ٽيسٽ ۾ ڀارت کي شڪست ڏئي 3 ميچن جي سيريز ۾ وائيٽ واش ڪري ڇڏيو.
نيوزيلينڊ جي ٽيم ڀارت کي 3 ميچن جي سيريز ۾ وائيٽ واش ڪندڙ دنيا جي چوٿين ٽيم بڻجي وئي، ان کان اڳ آسٽريليا، انگلينڊ ۽ ويسٽ انڊيز جون ٽيمون اهو ڪارنامو انجام ڏئي چڪيون آهن.
ڪيويز پهريون ڀيرو ڀارت کي 3 ميچن جي سيريز ۾ وائيٽ واش ڪيو آهي.
ممبئي ٽيسٽ جي پهرين اننگز ۾ نيوزيلينڊ 235 رنسون ٺاهيون، جواب ۾ ڀارت 263 رنسون ٺاهيون، ڪيوي ٽيم ٻي اننگز ۾ 174 رنسون ٺاهي سگهي ۽ ڀارت کي ڪاميابي لاءِ رڳو 146 رنسن جو هدف مليو پر ڀارتي ٽيم 121 رنسن تي ڍير ٿي وئي.
ٻي اننگز ۾ ڀارت طرفان پنت 64، واشنگٽن سندر 12، ڪپتان روهت شرما 11 رنسون ٺاهيون، ٻيو ڪو به رانديگر ڊبل فگر تائين نه پهتو.
ڪيويز طرفان اعجاز پٽيل بهترين بالنگ ڪندي 6 شڪار ڪيا، جڏهن ته هن ميچ ۾ مجموعي طور 11 وڪيٽون ورتيون ۽ کيس ميچ جو بهترين رانديگر قرار ڏنو ويو.
واضح رهي ته ڀارت کي 25 سالن کانپوءِ هوم ٽيسٽ سيريز ۾ وائيٽ واش شڪست ملي آهي.
