ڪراچي (ويب ڊيسڪ) اڳوڻي وزيراعظم ۽ عوامي پاڪستان پارٽي جي سربراهه شاهد خاقان عباسي چيو آهي ته ملڪ ان ڪري نٿو هلي سگهي ڇو ته ڪير به حلف جي پاسداري نٿو ڪري، جنهن ملڪ ۾ چونڊون چوريون ٿين اتي سياسي استحڪام نٿو اچي،دنيا جو هر نظام آزمايو ويو آهي ،
ڪراچي ۾ تقريب کي خطاب ڪندي عوامي پاڪستان پارٽي جي سربراهه شاهد خاقان عباسي چيو ته پارٽيون منشور ٺاهينديون آهن پوءِ ان کي وساري ڇڏينديون آهن. سڀ جماعتن جو منشور هڪ جهڙو آهي.
هن چيو ته ان ۾ ڪا به شق ناهي ، اڄ هر پاڪستاني پريشان آهي، توهان ڪنهن جلسي ۾ وڃو ته توهان کان پڇيو وڃي ته ملڪ جو ڇا ٿيندو، ماڻهو پڇن ٿا ته ملڪ جي مسئلن جو حل ڇا آهي؟هن چيو ته حڪومتون عوام جي خدمت ڪرڻ ۽ انهن کي سهولتون فراهم ڪرڻ لاءِ هونديون آهن، بجلي، پاڻي ۽ صحت جون سهولتون فراهم ڪرڻ حڪومت جي ذميواري آهي، ملڪ جي مسئلن جو حل آئين ۾ آهي، آئين ٽوڙيندڙ ملڪ ترقي نٿا ڪن. مسئلن جي حل لاءِ ڪم ڪرڻو پوندو.
شاهد خاقان عباسي چيو ته دنيا ۾ هر نظام کي آزمايو ويو آهي، هاڻي آئين کي ڏسو، ملڪ نٿو هليو ڇو ته سڀ حلف نٿا مڃين، سڌارن کانسواءِ ملڪ اڳتي نه وڌندو. هن چيو ته جيستائين آئيني رستي تي نه هلنداسين تيستائين ڪجهه نه ٿيندو، اسان کي آئين ڏانهن موٽڻو آهي، سمورن مسئلن جو حل آئين ۾ آهي، جنهن ملڪ ۾ چونڊون چوريون ٿيون اتي سياسي استحڪام ناهي. هن چيو ته اي پي پي جو مسئلو هوندو پر اصل مسئلو معيشت جي ناڪامي آهي، ملڪي معيشت جي حالت اها ئي آهي جيڪا 10 سال اڳ هئي، اسان جي ملڪ جي قيادت اڄ به پنهنجي مفادن لاءِ بيٺي آهي، جڏهن ته ارشد نديم هتي وڃي رهيو هو ته هڪ به وزير موجود نه هو.
