ڪراچي (ويب ڊيسڪ) صوبائي گهرو وزير ضياءُالحسن لنجار امن امان جي صورتحال بابت اجلاس جي صدارت ڪندي پوليس عملدارن کي هدايت ڪئي آهي ته اسٽريٽ ڪرائمز سميت ڏوهي عنصرن ۽ گروهن خلاف اثرائتي ۽ مضبوط ڪارروائي ڪئي وڃي، ڳجهي ڄاڻ کي گڏيل طور تي فالو ڪيو وڃي.
ڪراچي پوليس آفيس ۾ امن امان بابت اجلاس دوران گهرو وزير هدايت ڪئي ته ايس ايڇ اوز ڪمرن ۾ ويهڻ بدران ٻاهر نڪرن ۽ علائقن کي محفوظ بڻائين، رينڊم اسنيپ چيڪنگ، پوائنٽس ۽ علائقن ۾ پنهنجي موجودگي وائرليس ذريعي نوٽ ڪرائي وڃي.
هن هدايت ڪئي ته اسنيپ چيڪنگ دوران گاڏين ۽ موٽر سائيڪلن جو رڪارڊ ترتيب ڏنو وڃي ۽ شهر جي اندرين ۽ ٻاهرين پوائنٽس تي ناڪابندي ڪري چيڪنگ ۽ وائرليس ذريعي انٽريز نوٽ ڪرايون وڃن.
ڪراچي ۾ امن امان جي صورتحال سميت ڏوهن جي خاتمي بابت اعليٰ سطحي اجلاس ٿيو، اجلاس ۾ ڪراچي پوليس جي ڊي آءِ جيز، ايس ايس پيز ۽ ٻين سينيئر آفيسرن شرڪت ڪئي.
اجلاس ۾ آيڊيشنل آءِ جي ڪراچي مختلف علائقن ۾ ڏوهي وارداتن جي روڪٿام بابت بريفنگ ڏني.
ان کان اڳ گهرو وزير ضياءُ الحسن لنجار ڪراچي پوليس آفيس پهتو ته ايڊيشنل آءِ جي ڪراچي ۽ ٻين آفيسرن سندس آجيان ڪئي.
