لاهور (پ ر) الخدمت فائونڊيشن پاڪستان ۽ اردن هاشميٽ چيئرٽي آرگنائيزيشن وچ ۾ اردن کان غزه تائين سامان جي پهچائڻ سميت عوامي ڀلائي جي شعبن ۾ گڏجي ڪم ڪرڻ جو معاهدو طئي ٿي ويو آهي.
ان سلسلي ۾ الخدمت فائونڊيشن پاڪستان جي نائب صدر محمد عبدالشکور ۽ الخدمت آغوش جي نيشنل ڊائريڪٽر ايئر مارشل (ر) ارشد ملڪ اردن جي خيراتي تنظيم هاشميٽ فائونڊيشن جي وفد سان ملاقات ڪئي، جنهن ۾ الخدمت فائونڊيشن پاڪستان جي نائب صدر محمد عبدالشکور ۽ اردن هاشميٽ چيئرٽي جي سيڪريٽري جنرل ڊاڪٽر حسين الشبلي مفاهمت جي ياداشت تي صحيحون ڪيون.
ان موقعي تي اردن ۾ پاڪستان جو اعزازي سفير محمد اجمل اقبال پڻ موجود هو. الخدمت فائونڊيشن پاڪستان جي نائب صدر محمد عبدالشکور معاهدي جا تفصيل بيان ڪندي چيو ته عوامي ڀلائي جي شعبي ۾ گڏيل تعاون ۽ غزه ۾ امدادي سرگرمين جي نظام کي هموار ڪرڻ لاءِ هڪ معاهدو ڪيو ويو آهي. ان کان اڳ پاڪستان مان سامان رڳو مصر جي رفح ڪراسنگ ذريعي غزه تائين پهچندو هو پر گڏيل قومن ۽ عالمي دٻاءَ جي نتيجي ۾ اسرائيل امدادي سامان جي ترسيل لاءِ نئون رستو اختيار ڪرڻ تي راضي ٿي ويو آهي، جنهن سان رفح ڪراسنگ تي رش گهٽجي ويندي. ان سان گڏ ٻيا انتظامي معاملا به بهتر ٿيندا.
الخدمت فائونڊيشن تحت پاڪستان مان اردن پهچندڙ امدادي سامان غزه ۾ اسرائيل ۾ شلون ڪراسنگ جي متاثرن تائين پهچندو.
اردن جي هاشميٽ خيراتي تنظيم امداد فراهم ڪندي ۽ گڏوگڏ گڏيل قومن جي رليف ۽ ورڪ ايجنسي سان رپورٽنگ جو ڪم به انجام ڏيندي.
محمد عبدالشکور جو چوڻ هو ته پاڪستان کان اردن پهچڻ بعد امدادي سامان 24 ڪلاڪن ۾ غزه پهچندو ۽ اڄ پهرين ٽرڪ جنهن ۾ خوراڪ ۽ دوائون شامل آهن غزه رواني ڪئي وئي آهي.
اردن ۾ مقرر پاڪستاني سفير محمد اجمل اقبال غزه جي عوام لاءِ الخدمت فائونڊيشن جي ڪوششن کي ساراهيو ۽ اردن کي امدادي سامان پهچائڻ جي حوالي سان هر ممڪن تعاون جو يقين ڏياريو.
هن خيراتي تنظيم جي گودام جو دورو پڻ ڪيو، جتي تنظيم جي سيڪريٽري جنرل ڊاڪٽر حسين الشبلي کيس غزه ۾ جاري امدادي سرگرمين بابت بريفنگ ڏني.
