معدي جي ڪينسر، بيماريءَ جي شروعاتي مرحلي ۾ اڪثر اهڙين علامتن سان ظاهر ٿيندي آهي، جيڪي عام بد هضمي يا معدي جي خرابي جهڙيون هونديون آهن. انهيءَ ڪري ڪجهه ماڻهو انهن کي معمولي تڪليف سمجهي نظرانداز ڪري ڇڏيندا آهن، جڏهن ته ماهرن موجب، بيماريءَ جي وقت سر سڃاڻپ علاج جا نتيجا بهتر بڻائڻ ۾ اهم ڪردار ادا ڪري سگهي ٿي.
شروعاتي مرحلي ۾ ڪجهه مريضن کي ڪا خاص تڪليف به محسوس نه ٿيندي آهي، پر جيڪڏهن علامتون ظاهر ٿين ته انهن ۾ لڳاتار بد هضمي، اهڙي ڇاتيءَ جي ساڙ، جيڪا عام دوائن سان ختم نه ٿئي، هلڪا اوڪارا اچڻ، بک گهٽجڻ ۽ معمول کان گهٽ کاڌو کائڻ باوجود پيٽ ڀرجي وڃڻ جو احساس شامل ٿي سگهي ٿو.
کاڌي کائڻ کان پوءِ بار بار پيٽ ڦوڪجڻ يا پيٽ جي مٿئين حصي ۾ بنا ڪنهن چٽي سبب جي تڪليف ٿيڻ به اهڙيون علامتون آهن، جن تي ڌيان ڏيڻ ضروري آهي. انهن علامتن مان هر ڀيري ڪينسر هجڻ جو مطلب نٿو نڪري، پر جيڪڏهن اهي لڳاتار برقرار رهن ته ڊاڪٽر کان طبي معائنو ڪرائڻ ضروري ٿي سگهي ٿو.
بيماري وڌڻ سان علامتن جي نوعيت به تبديل ٿي سگهي ٿي. بنا ڪنهن سبب جي وزن گهٽجڻ، پيٽ ۾ لڳاتار سور، الٽي ۽ ڪجهه حالتن ۾ رت واري الٽي ٿيڻ جهڙيون علامتون ظاهر ٿي سگهن ٿيون. رت جي کوٽ سبب غيرمعمولي ٿڪاوٽ محسوس ٿيڻ ۽ کاڌو ڳهڻ ۾ ڏکيائي به بيماريءَ جي وڌيڪ نمايان علامتن ۾ شامل ٿي سگهن ٿيون.
وڌيڪ ڳنڀير حالت ۾ پيٽ اندر پاڻي گڏ ٿيڻ يا چمڙي ۽ اکين جو رنگ پيلو ٿيڻ جهڙي ڪيفيت به پيدا ٿي سگهي ٿي، خاص طور تي جڏهن بيماري جسم جي ٻين حصن تائين پکڙجي چڪي هجي.
ماهرن جو چوڻ آهي ته انهن مان گهڻيون علامتون معدي جي ٻين عام بيمارين سبب به ٿي سگهن ٿيون، تنهنڪري اهڙيون علامتون ڏسي فوري طور ڪينسر هجڻ جو نتيجو نه ڪڍڻ گهرجي. تنهن هوندي به، جيڪڏهن ڪا غيرمعمولي علامت ڪيترن ئي هفتن تائين برقرار رهي، خاص طور تي ان سان گڏ بنا ڪنهن سبب جي وزن گهٽجي رهيو هجي يا ٿورو کاڌو کائڻ کان پوءِ به پيٽ ڀريل محسوس ٿئي، ته ڊاڪٽر سان ضرور صلاح ڪرڻ گهرجي.
هاضمي، بک، وزن ۽ جسماني توانائيءَ ۾ لڳاتار ٿيندڙ تبديلين کي نظرانداز نه ڪرڻ صحت لاءِ اهم آهي. اهڙين علامتن جي وقت سر طبي جاچ، جيڪي وقت گذرڻ باوجود ختم نه ٿين، بيماريءَ جي سڃاڻپ ۽ مناسب علاج ڏانهن پهريون قدم ثابت ٿي سگهي ٿي.
