تهران/واشنگٽن (ويب ڊيسڪ)آمريڪي نيوز ويب سائيٽ ايگزيُوس دعويٰ ڪئي آهي ته آمريڪا ۽ ايران وچ ۾ ٿيل تازين ڳالهين ۾ ڪا خاص اڳڀرائي نه ٿي سگهي، جڏهن ته ڳالهين کان واقف ٽن ذريعن ٻڌايو آهي ته سفارتي اڳڀرائي لاءِ قطر جي ٽياڪڙي ڪوششون رولڙي جو شڪار آهن ۽ ٻئي ڌريون پنهنجي موقف تان پوئتي هٽڻ لاءِ تيار ناهن.
ايگزيُوس موجب، قطري ٽياڪڙ ڳالهين ۾ اڳڀرائي لاءِ ڪوششون جاري رکندا، پر آمريڪا ۽ ايران ٻنهي جي روين سبب سندن مايوسي وڌندي پئي وڃي.
رپورٽ موجب، ٻه ڏينهن اڳ قطري ٽياڪڙ علي الثوادي نيويارڪ ۾ ايراني پرڏيهي وزير عباس عراقچي ۽ سندس ٽيم سان ملاقات ڪئي، جنهن دوران قطر طرفان پيش ڪيل ٻن صفحن تي ٻڌل ٺاهه جي تجويز تي ڳالهه ٻولهه ٿي.
تجويز ۾ ايران طرفان آمريڪي سامونڊي ناڪابندي ختم ڪرڻ جي درخواست ۽ آمريڪا طرفان ايران کان جوهري معاملن ۾ رعايت ڏيڻ جو مطالبو شامل هو.
ايگزيُوس موجب، عباس عراقچي سان ملاقات کان پوءِ قطري ٽياڪڙ واشنگٽن ۾ جيرڊ ڪشنر ۽ ٻين آمريڪي اختيارين سان پڻ ملاقات ڪئي، جنهن جي هڪ حصي ۾ نائب صدر جَي ڊِي وينس به شرڪت ڪئي.
ذريعن موجب، پاڪستان ۽ مصر سميت ٻين علائقائي ٽياڪڙ پڻ ايران تي جوهري معاملن ۾ رعايت ڏيڻ لاءِ زور ڀريو، تنهن هوندي به ايران جو موقف آهي ته هو ان معاملي تي تڏهن ئي غور ڪندو، جڏهن آمريڪا جون جي مفاهمتي ٺاهه ڏانهن واپس ايندو.
