گهر ۾ ڪوئا يا ڪاڪروچ هڪ ڀيرو ديرو ڄمائي ويهن ته انهن مان ڇوٽڪارو حاصل ڪرڻ ڪافي ڏکيو ٿي وڃي ٿو. رڌڻي جي الماڙين کان وٺي سنڪ جي هيٺان ۽ گهر جي اونداهين ڪنڊن تائين، اهي مصيبتون وري اهڙي هنڌن تي لڪي وينديون آهن جتان انهن کي ڳولڻ سولو ناهي هوندو.
بازار ۾ انهن مان ڇوٽڪارو حاصل ڪرڻ لاءِ مختلف اسپري ۽ دوائون موجود آهن، پر ڪجهه گهريلو نسخا به ڪافي مشهور آهن. اهڙو ئي هڪ نسخو کيري، بيڪنگ سوڊا، اٽي ۽ کنڊ جي مدد سان تيار ڪيو ويندو آهي.
هن گهريلو نسخي لاءِ بيڪنگ سوڊا، اٽو ۽ پيٺل کنڊ اڌ اڌ ڪوپ کڻي، انهن کي چڱيءَ ريت ملائي وٺو. ڪجهه ئي منٽن ۾ گهربل پائوڊر تيار ٿي ويندو.
هڪ کيرو وٺي ان جا ٿلها ٽڪرا ڪيو ۽ تيار ڪيل پائوڊر انهن ٽڪرن مٿان وجهي ڇڏيو. ان کان پوءِ اهي ٽڪرا رڌڻي يا گهر جي انهن ڪنڊن ۾ رکو، جتي ڪوئا يا ڪاڪروچ وڌيڪ نظر ايندا هجن.
هن گهريلو نسخي بابت دعويٰ ڪئي ويندي آهي ته اهو ڪوئن ۽ ڪاڪروچن کي گهر کان پري رکڻ ۾ مددگار ثابت ٿي سگهي ٿو، پر ان کي جيتن يا ڪوئن کان ڇوٽڪارو حاصل ڪرڻ جو يقيني ۽ سائنسي طور ثابت ٿيل طريقو نٿو سمجهڻ گهرجي.
ڪوئن ۽ ڪاڪروچن جي ٻيهر اچڻ کي روڪڻ لاءِ گهر ۾ کاڌي جا ٽڪرا نه ڇڏڻ، ڪچرو ڍڪ واري دٻي ۾ رکڻ، پاڻيءَ جي نيڪال کي درست ڪرڻ ۽ ڀتين يا دروازن ۾ موجود سوراخ ۽ ڏار بند ڪرڻ وڌيڪ اهم آهي.
ٻارن ۽ پالتو جانورن وارن گهرن ۾ انهن کي ڪنهن به قسم جي پائوڊر جي پهچ کان پري رکڻ ضروري آهي.
