ڪراچي (ويب ڊيسڪ) صحت واري صوبائي وزير عذرا فضل پيچوهو چيو آهي ته ملڪ اڳ ئي ڏکين حالتن مان گذري رهيو آهي، اهڙي صورتحال ۾ نوان انتظامي يونٽ ٺاهڻ دانشمنداڻو فيصلو نه هوندو.
سنڌ اسيمبلي جي اجلاس ۾ خطاب ڪندي عذرا فضل پيچوهو چيو ته اڃا به ڪجهه آواز اٿي رهيا آهن، جن ۾ ٻاهرين ۽ نان اسٽيٽ ايڪٽرز ۽ ٻين ڌرين جو ڪردار نظر اچي ٿو، جيڪي سنڌ اسيمبلي بابت اهو موقف رکن ٿا ته سنڌ کي ٽوڙڻ گهرجي ۽ سنڌ ۾ وڌيڪ صوبا ٺاهڻ گهرجن ته جيئن انتظام بهتر ٿي سگهي.
هن چيو ته انتظامي ڍانچو اڳ ئي موجود آهي ۽ انتظام کي بهتر بڻائڻ لاءِ نوان انتظامي يونٽ ٺاهڻ ضروري ناهي.
عذرا فضل پيچوهو چيو ته منهنجي خيال ۾ موجود انتظامي يونٽن کي وڌيڪ يونٽن ۾ ورهائڻ مناسب نه هوندو، خاص طور تي اهڙي وقت جڏهن ملڪ ۾ بچت (آسٽرٽي) ۽ مالي تنگي جي ڳالهه ٿي رهي آهي، اهڙي صورتحال ۾ انتظامي يونٽن جو تعداد وڌائڻ جي ڳالهه بلڪل غير دانشمنداڻو فيصلو هوندو.
