اسلام آباد(بيورو رپورٽ)جمعيت علماءِ اسلام (جي يو آءِ) جي سربراهه مولانا فضل الرحمان مخالف ڌر جي اڳواڻ محمود خان اچڪزئي سان ملاقات کان پوءِ متحده اپوزيشن جي قيام جو اعلان ڪيو. مولانا فضل الرحمان پارليامينٽ هائوس ۾ مخالف ڌر جي اڳواڻ محمود خان اچڪزئي سان سندس چيمبر ۾ ملاقات ڪئي. مولانا فضل الرحمان جي وفد ۾ ڪامران مرتضيٰ ۽ مولانا واسع شامل هئا، جڏهن ته محمود خان اچڪزئي سان گڏ اخونزاده حسين يوسفزئي ۽ اسد قيصر به هئا. ملاقات کان اڳ ميڊيا سان مختصر ڳالهه ٻولهه ۾ مولانا فضل الرحمان چيو ته جيڪڏهن اهو سندس هٿن ۾ هجي ها ته پي ٽي آءِ جو باني هاڻي تائين ٺيڪ ٿي چڪو هجي ها. اپوزيشن اڳواڻ سان ملاقات کان پوءِ مولانا فضل الرحمان ميڊيا سان ڳالهه ٻولهه ۾ متحده اپوزيشن جي قيام جو اعلان ڪيو. هن چيو ته سينيٽ ۽ قومي اسيمبلي جي مخالف ڌر جي اڳواڻن سان صلاح مشورا ٿيا آهن ۽ اصولي طور تي هڪ اتفاق ٿيو آهي ته اسان کي هڪ گڏيل اپوزيشن ڏانهن وڌڻ گهرجي، اسان هڪ گڏيل پارلياماني ڪردار ادا ڪرڻ چاهيون ٿا، ان حوالي سان وڌيڪ صلاح مشورا جاري رهندا، ان تي وڌيڪ ملاقاتون ٿينديون، اميد آهي ته اهو هڪ سٺي شروعات هوندي، ۽ مخالف ڌر جي پارٽين جي آل پارٽيز ڪانفرنس لاءِ ماحول پڻ پيدا ڪيو وڃي. صحافي پڇيو ته ڇا پيپلز پارٽي کي گڏ ڪيو ويندو؟ ان تي هن چيو ته پيپلز پارٽي حڪومت ۾ آهي. صحافي پڇيو ته ڇا اوهان روڊن تي يا پارليامينٽ ۾ سندس حمايت ڪندا، جنهن تي هن جواب ڏنو ته اسان سوره فاتحه پڙهون ٿا ۽ توهان سوره الناس تائين پهچندا آهيو.
