اسلام آباد (ويب ڊيسڪ) وزيراعظم شهباز شريف موسمياتي تبديلين جي خطرن کي منهن ڏيڻ لاءِ وفاقي ۽ صوبائي سطح تي سهڪار کي اڻٽر قرار ڏئي ڇڏيو.
وزيراعظم جي صدارت هيٺ چوماسي جي تياري ۽ ماحولياتي خطرن کان بچاءُ واري نظام جو جائزو وٺڻ بابت اجلاس ٿيو.
وزيراعظم چيو ته پاڪستان موسمياتي تبديلين جي هاڃيڪارن اثرن کان متاثر ملڪن ۾ شامل آهي، موسمياتي تبديلين جي خطرن کي منهن ڏيڻ لاءِ وفاقي ۽ صوبائي سطح تي سهڪار اڻٽر آهي.
وزيراعظم موسمياتي تبديليءَ واري وزير ۽ چيئرمين اين ڊي ايم اي کي هدايت ڪئي ته هو هلندڙ هفتي صوبن، آزاد ڪشمير ۽ گلگت بلتستان جو دورو ڪن.
وزيراعظم چيو ته اهو دورو چوماسي برساتن جي اڳواٽ تياري مڪمل ڪرڻ لاءِ ڪيو ويندو.
رٿابندي واري وزير جي نگرانيءَ ۾ نيشنل ڊيزاسٽر مئنيجمينٽ ۽ لاڳاپيل وزارتن جي ايمرجنسي ريسپانس ڪميٽي ٺهندي، جيڪا صوبائي لاڳاپيل ادارن سان عملي سهڪار لاءِ ڪم ڪندي.
وزيراعظم هدايت ڪئي ته ناڻي وارو وزير چوماسي جي امڪاني تباهيءَ جي صورت ۾ هنگامي فنڊ لاءِ اڳواٽ تياري ڪري، امڪاني ٻوڏ جي صورتحال ۽ خطرن کان بچاءُ لاءِ اپاءَ هڪ گڏيل روڊ ميپ تحت ترتيب ڏنا وڃن.
