اڪثر ماڻهو اهو سمجهي اي سگريٽ يا ويپنگ جو استعمال ڪندا آهن ته ان سان صحت تي نقصانڪار اثر نه پوندا، پر هڪ نئين تحقيق ۾ انڪشاف ٿيو آهي ته اي سگريٽ ۾ موجود نڪوٽين ڦڦڙن ۽ وات جي ڪينسر جو خطرو وڌائي سگهي ٿي.
پرڏيهي خابرو اداري جي رپورٽ موجب آسٽريليا جي يونيورسٽي ۾ ڪيل طبي تحقيق ۾ اي سگريٽ جي استعمال سان صحت تي پوندڙ اثرن جو جائزو ورتو ويو. تحقيق ۾ هن موضوع تي اڳ ۾ ٿيل مختلف تحقيقي ڪمن جو تجزيو ڪيو ويو، جنهن مان معلوم ٿيو ته اي سگريٽ جو استعمال به ڪينسر جو سبب بڻجي سگهي ٿو.
ماهرن ٻڌايو ته هي ان حوالي سان ڪيل سڀ کان جامع تحقيقي ڪم آهي، جنهن مان ظاهر ٿئي ٿو ته اي سگريٽ استعمال ڪندڙن ۾ ڪينسر جو خطرو وڌي سگهي ٿو. تحقيق ۾ اهو به سامهون آيو ته اهو تصور درست ناهي ته اي سگريٽ سان ڪينسر جو ڪو خطرو نه هوندو.
ماهرن جو چوڻ هو ته تحقيق معياري آهي، پر نتيجن جي وڌيڪ تصديق لاءِ وڌيڪ مطالعي جي ضرورت آهي. سندن موجب عام طور اهو خيال ڪيو ويندو آهي ته اي سگريٽ سگريٽ ڇڪڻ ۽ ڪينسر کان بچاءُ ۾ مددگار ٿي سگهي ٿي، پر موجوده شاهدين مان ان جي تصديق نٿي ٿئي.
تحقيق موجب موجوده ثبوتن مان اشارو ملي ٿو ته اي سگريٽ جي استعمال سان ڦڦڙن جي ڪينسر جو خطرو چار ڀيرا وڌي سگهي ٿو. ماهرن چيو ته مڪمل تصديق لاءِ انسانن تي ڪلينڪل ٽرائلز جي ضرورت هوندي.
تحقيق جا نتيجا طبي جرنلڪارسينوجنيسز ۾ ڇپيا ويا آهن.
