ڪراچي(ع آ نيوز) متحده قومي موومينٽ پاڪستان جي مرڪزي اڳواڻ امين الحق جو چوڻ آهي ته ايم ڪيو ايم جون پارٽي اندر چونڊون آڪٽوبر جي پهرين هفتي ۾ ٿينديون. ميڊيا سان ڳالهائيندي امين الحق چيو ته پهرين رابطا ڪميٽي يا سينٽرل ڪميٽي جي چونڊ ڪئي ويندي پوءِ اهو فيصلو ڪيو ويندو ته ڪير ڪنوينر ۽ ڊپٽي ڪنوينر هوندو. ايم ڪيو ايم پاڪستان مئي 2024 ۾ اعلان ڪيو هو ته هن ڊاڪٽر خالد مقبول صديقي کي پارٽي چيئرمين چونڊيو آهي. جڏهن ته هن ٽٽل پارٽي کي هڪ ڇت هيٺ آندو، ماضي ۾ اهم عهدن تي مقرر ڪيل ڪيترن ئي پراڻن ايم ڪيو ايم اڳواڻن ۽ شخصيتن چونڊ عمل کي ايم ڪيو ايم جي آئين جي روح جي واضح ڀڃڪڙي قرار ڏنو هو. ايم ڪيو ايم پاڪستان کي 15 آڪٽوبر تائين انٽرا پارٽي چونڊون ڪرائڻ جو حڪم ڏنو آهي.. ان سوال تي ته ڇا پارٽي ۾ چونڊن لاءِ چونڊ فهرست کي حتمي شڪل ڏني وئي آهي، امين الحق چيو ته چونڊ فهرست تيار ٿيڻ جي مرحلي ۾ آهي، اهو عمل باهمي رضامندي، جمهوري طريقيڪار ۽ اتفاق راءِ سان ڪيو ويندو، جنهن کان پوءِ پارٽي اندر چونڊون منصفاڻي طريقي سان ٿينديون. ان سوال تي ته ڇا خالد مقبول صديقي، مصطفيٰ ڪمال، فاروق ستار يا ڪامران ٽيسوري هڪ ٻئي خلاف ڪنوينر چونڊ وڙهندا يا اهو عمل به باهمي رضامندي سان طئي ڪيو ويندو؟امين الحق چيو ته ايم ڪيو ايم هڪ جمهوري پارٽي آهي، پنهنجي آئين تحت رابطا ڪميٽي مکيه فورم آهي، اها جنهن کي چاهيندي ڪنوينر ۽ ڊپٽي ڪنوينر چونڊيندي، اهو عمل جمهوري ۽ اتفاق راءِ سان مڪمل ڪيو ويندو ۽ باوقار طريقي سان اڳتي وڌايو ويندو.
