پاڪستاني فوج جي عوامي لاڳاپن واري شعبي (آءِ ايس پي آر) موجب خيبر پختونخوا ۾ انٽيليجنس ڄاڻ جي بنياد تي سيڪيورٽي فورسز جون ڪارروائيون جاري آهن، جن جو مقصد شدت پسند گروپن جي نيٽورڪ کي ختم ڪرڻ آهي.
بيان ۾ چيو ويو آهي ته آپريشن دتّا خيل، سپين وام ۽ بنون سميت مختلف علائقن تائين وڌايو ويو آهي، جتي تازن ڏينهن ۾ شدت پسندن خلاف ڪيتريون ئي ڪارروايون ڪيون ويون آهن.
آءِ ايس پي آر موجب گذريل 48 ڪلاڪن دوران سيڪيورٽي فورسز ۽ شدت پسندن جي وچ ۾ مختلف هنڌن تي ڇڪتاڻ ٿي، جن ۾ وڌيڪ 23 شدت پسند مارجي ويا. مارجي ويلن ۾ هڪ اهم ڪمانڊر جان مير عرف طور ثاقب به شامل آهي، جيڪو سيڪيورٽي فورسز لاءِ گهربل هو ۽ مٿس وڏو انعام پڻ رکيل هو.
فوج موجب مارجي ويل جوابدار مختلف شدت پسند ڪارروائين ۾ ملوث هئا، جن ۾ سيڪيورٽي اهلڪارن ۽ شهرين کي نشانو بڻائڻ به شامل هو.
بيان ۾ چيو ويو آهي ته ڪارروائين دوران هٿيار، گولابارود ۽ ڌماڪيدار مواد پڻ هٿ ڪيو ويو، جڏهن ته شدت پسندن جي استعمال هيٺ سرنگن ۽ بنڪرن جو نيٽورڪ به تباهه ڪيو ويو.
آءِ ايس پي آر جو چوڻ آهي ته علائقن ۾ وڌيڪ ڪارروائيون جاري رهنديون ته جيئن اتي موجود شدت پسندن جو مڪمل خاتمو ڪري سگهجي، ۽ ملڪ ۾ دهشتگردي جي خاتمي لاءِ مهم جاري رکندي.
