ڀارتي رپورٽ موجب انوراگ ڪشپ جي هدايتڪاري هيٺ ٺهيل فلم ”بندر“ جو ٽيزر 7 مئي تي جاري ڪيو ويو آهي، جنهن ڏسندڙن کي فلم جي منفرد ڪهاڻي ۽ انداز جي پهرين جهلڪي ڏيکاري. هي فلم 5 جون 2026ع تي سڄي دنيا جي سينيما گهرن ۾ رليز ٿيندي. رپورٽن موجب هي فلم بابي ديول ۽انوراگ ڪشپ جي پهرين گڏيل منصوبي طور به ڏٺي پئي وڃي، جنهن سبب مداحن ۾ وڏي دلچسپي پيدا ٿي وئي آهي.
ڀارتي رپورٽن موجب ٽيزر ۾ بابي ديول کي انتهائي مختلف ۽ رنگين انداز ۾ پيش ڪيو ويو آهي، جيڪو سندس تازن سنجيده ۽ اونداهن ڪردارن کان مڪمل طور مختلف نظر اچي ٿو. ٽيزر جي شروعات ۾ تيز رفتار، رنگين ۽ افراتفري وارو ماحول ڏيکاريو ويو آهي، پر آهستي آهستي فلم جو ماحول وڌيڪ جذباتي ۽ ڳنڀير ٿيندو وڃي ٿو، جنهن مان ظاهر ٿئي ٿو ته ڪهاڻي رڳو هلڪي ڦلڪي نه پر پيچيده لاڳاپن ۽ جذباتي تڪرارن تي به ٻڌل هوندي. ٽيزر ۾ 70ع واري مشهور گاني ”ڪم آن بي بي دل ڪسڪو ديگي“ جي نئين انداز ۾ پيشڪش پڻ شامل آهي، جيڪا بابي ديول جي ڊسڪو طرز واري روپ سان گڏ وڌيڪ ڌيان ڇڪائي ٿي.
ڀارتي رپورٽن موجب فلم ۾ سانيا ملهوترا، راج بي شيٽي، سپنا پبي، صبا آزاد، رڌي سين، جتيندر جوشي، اندراجيت ۽ ناگيش ڀونسلي پڻ اهم ڪردارن ۾ شامل آهن. فلم جي ڪهاڻي سُديپ شرما ۽ اڀيشيڪ بينرجي لکي آهي، جيڪي پاتل لوڪ، ڪوهرا ۽ اُڙتا پنجاب جهڙن منصوبن سبب مشهور آهن.
رپورٽن موجب انوراگ ڪشپ هڪ ڀيرو ٻيهر انساني لاڳاپن، جذباتي ڇڪتاڻ ۽ اخلاقي پيچيدگين تي ٻڌل ڪهاڻي پيش ڪرڻ جي ڪوشش ڪئي آهي، جنهن سبب بندر کي جون 2026ع جي اهم فلمن مان هڪ قرار ڏنو پيو وڃي.
