خيبر پختونخوا جي وڏي وزير سهيل آفريدي طرفان عمران خان آزادي فورس قائم ڪرڻ جو اعلان دراصل تحريڪِ انصاف اندر قيادت جي کوٽ ۽ درست حڪمتِ عملي ۾ ناڪاميءَ جو صاف ثبوت آهي۔ جيتوڻيڪ هن چيو آهي ته هي فورس حقيقي آزادي لاءِ پرامن جدوجهد ڪندي، پر جنهن لهجي ۽ لفظن سان اها ڳالهه ڪئي وئي آهي، انهن کي ٽڪراءَ جي دعوت کانسواءِ ٻيو ڪو نالو ڏيڻ ڏکيو آهي۔
پهريون ته ملڪ هن وقت ڪنهن به قسم جي ٽڪراءَ جو متحمل نٿو ٿي سگهي۔ هڪ اهم صوبي جي وڏي وزير طور سهيل آفريدي کي ان ڳالهه جو ڀرپور احساس هئڻ گهرجي۔ اهو بحث ٿي سگهي ٿو ته عمران خان سان ڪيتري حد تائين زيادتي ٿي رهي آهي يا سندس خلاف قائم ڪيس ناجائز آهن يا انهن ۾ ڪا حقيقت به موجود آهي۔ پر اهي سڀ ڳالهيون هن ملڪ جي سياست جو حصو رهيون آهن۔ غلط هجڻ باوجود اهو طريقو هميشه اختيار ڪيو ويو آهي۔ حتيٰ جو حقيقي آزادي، تبديلي ۽ پاڪستان کي جنت بڻائڻ جا دعويدار عمران خان به پنهنجي سڄي اقتدار واري دور ۾ ڪنهن کي نه ڇڏيندس جو نعرو هڻندا رهيا ۽ سياسي مخالفن کي تڪليف ۾ رکڻ جون حڪمت عمليون اختيار ڪندا رهيا۔ غير جانبدار مبصر عمران خان جي قيد کي ناجائز قرار ڏين ٿا، پر ان جو هرگز اهو مطلب نه ٿو ٿي سگهي ته هڪ غلط کي درست ڪرڻ لاءِ ڪنهن به پارٽي يا فرد کي اهڙا قدم کڻڻ جي اجازت ڏني وڃي، جيڪي سڌي طرح رياست جي وجود لاءِ خطرو بڻجي سگهن۔ هن معاملي جو ٻيو پاسو تحريڪِ انصاف جي اندروني سياست ۽ ان ۾ موجود ڌڙن سان لاڳاپيل آهي۔ سهيل آفريدي نه ته عمران خان جا ترجمان آهن ۽ نه ئي تحريڪِ انصاف جا واحد نمائندا، پر هو شايد هن زعم ۾ ورتل آهن ته کين عمران خان نامزد ڪري وڏي وزير بڻايو هو۔ تنهن ڪري هو هاڻي پنهنجي وفاداري ثابت ڪرڻ لاءِ افسوسناڪ انتهاپسنديءَ جو طريقو اختيار ڪري رهيا آهن۔ تحريڪِ انصاف جي اها ئي ڪمزوري دراصل ان جي پيرن جي زنجير بڻجي چڪي آهي۔ جيڪي معاملا سياسي ڳالهين ذريعي خوش اسلوبي سان حل ٿي سگهن ٿا، تن کي ڌمڪين ۽ ٽڪراءَ واري روش سان بند ڪيو ويو آهي۔
ان جو تازو مثال عمران خان جي اکين جي بيماري جي معاملي ۾ ڏٺو ويو۔ عمران خان جي نظر بابت گمراهه ڪندڙ بيانيو ٺاهي حڪومت تي دٻاءُ وجهڻ ۽ پنهنجي شرطن تي علاج ڪرائڻ جي ڪوشش ڪئي وئي۔ اهو ڪنهن بيمار شخص سان همدردي جو طريقو نه هو، پر ان سان سياسي فائدو وٺڻ جي ڪوشش ڪئي وئي۔ محمود خان اچڪزئي ۽ علامه راجه ناصر عباس وانگر سهيل آفريدي به انهن ڪوششن ۾ ناڪام رهيا۔ حڪومت پنهنجي طريقي موجب ميڊيڪل معائنو ڪرايو ۽ مناسب علاج فراهم ڪيو۔ اها اطمينان بخش رپورٽ هاڻي سپريم ڪورٽ ڏانهن موڪلي وئي آهي۔ جيڪڏهن سپريم ڪورٽ تي ئي ڀروسو ڪيو وڃي ها ته ممڪن هو چيف جسٽس ان رپورٽ جي بنياد تي عمران خان کي اسپتال داخل ڪرڻ جو حڪم ڏين ها۔ پر سهيل آفريدي جهڙا ماڻهو سپريم ڪورٽ ٻاهران بيهي اهو دعويٰ ڪري رهيا آهن ته عدالتون پنهنجا حڪم لاڳو ڪرائڻ ۾ ناڪام ٿي چڪيون آهن۔ جيڪڏهن اها ناڪامي آهي ته پوءِ تحريڪِ انصاف جا وڪيل فرينڊ آف ڪورٽ بڻجي عمران خان سان ملڻ ڇو ويا هئا؟
اپوزيشن کي نيٺ روڊ بلاڪ ۽ پارليامينٽ جو ڌرڻو ختم ڪرڻو پيو۔ ڪي پي هائوس جو ڌرڻو به ٻه ڏينهن اڳ ختم ڪرايو ويو هو۔ هاڻي سهيل آفريدي اهڙي فورس ٺاهڻ جو اعلان ڪري رهيا آهن، جنهن جا ميمبر ڀرتي ڪيا ويندا، باقاعده حلف وٺرايو ويندو ۽ هڪ چين آف ڪمانڊ تحت ويڙهه وڙهندا۔ پر سهيل آفريدي جو دعويٰ آهي ته اها ويڙهه پرامن هوندي۔ کين ڄاڻڻ گهرجي ته پرامن جدوجهد ڪئي ويندي آهي، امن لاءِ ويڙهه نه وڙهي ويندي آهي۔ سياسي ڪارڪن رضاڪارانه طور هڪ سياسي مقصد لاءِ احتجاج ڪندا آهن ۽ پنهنجا مطالبا پيش ڪندا آهن۔ اهي ڌمڪيون ناهن ڏيندا ۽ نه ئي اهو اعلان ڪندا آهن ته اسين ويڙهه وڙهنداسين ۽ ڀرپور تياري سان وڙهنداسين۔ اها ويڙهه حقيقي آزادي لاءِ وڙهنداسين۔
عمران خان آزادي فورس قائم ڪرڻ جو اعلان دراصل اهو اعتراف آهي ته تحريڪِ انصاف پارٽي طور پنهنجو ڪو واضح تشخص يا وجود برقرار نه رکي سگهي آهي۔ ڪجهه ماڻهو عمران خان جو نالو استعمال ڪري زهر اوڳاڙين ٿا ۽ پنهنجا پنهنجا مقصد حاصل ڪرڻ جي ڪوشش ڪن ٿا۔ تحريڪِ انصاف 9 مئي 2023 تي اهڙو رياست مخالف رستو اختيار ڪري چڪي آهي۔ ان مان کين ڪا ڪاميابي نه ملي ۽ پارٽي جو سياسي سفر به ڏکيو ٿي ويو۔ تنهن هوندي به ان سانحي مان سبق سکڻ ۽ سياسي جدوجهد جو رستو اختيار ڪرڻ بدران، هاڻي هڪ صوبي جو وڏو وزير اهڙي فورس ٺاهڻ تي اڙيل آهي، جيڪا جٿن جي صورت ۾ پنهنجو مقصد حاصل ڪرڻ جي ڪوشش ڪندي۔ سهيل آفريدي چيو آهي ته ان جو ڪمانڊر عمران خان مقرر ڪندا، پر حالتن کي ڏسندي اندازو لڳائي سگهجي ٿو ته شايد سهيل آفريدي پاڻ ئي ان فورس جي قيادت جا خواهشمند هوندا۔ ميمبر سازي ۽ حلف برداري کان پوءِ اها فورس ڇا ڪندي؟ جيڪڏهن ان جي نالي مان مقصد سمجهڻ جي ڪوشش ڪئي وڃي ته اهو ئي لڳي ٿو ته جٿو بڻائي اڊيالا جيل تي چڙهائي ڪري پنهنجي اڳواڻ کي آزاد ڪرائڻ جي ڪوشش ڪئي ويندي۔
ڇا واقعي سهيل آفريدي ۽ تحريڪِ انصاف ۾ سندن سرپرست اهو سمجهي ويٺا آهن ته رياست اهڙي قانون شکني برداشت ڪري وٺندي ۽ پي ٽي آءِ کي ڪو وڏو نقصان نه پهچندو؟ عمران خان جي حامين ۽ تحريڪِ انصاف جي همدردن کي سمجهڻ گهرجي ته اهڙا اعلان ۽، خدا نه ڪري، انهن تي عمل ڪرڻ جي ڪوشش دراصل تحريڪِ انصاف ۽ عمران خان جي بچيل سياسي حيثيت کي به دفن ڪرڻ جي برابر هوندي۔
عمران خان آزادي فورس قائم ڪرڻ جو اعلان دراصل اهو اعتراف آهي ته تحريڪِ انصاف پارٽي طور پنهنجو ڪو واضح تشخص يا وجود برقرار نه رکي سگهي آهي۔ ڪجهه ماڻهو عمران خان جو نالو استعمال ڪري زهر اوڳاڙين ٿا ۽ پنهنجا پنهنجا مقصد حاصل ڪرڻ جي ڪوشش ڪن ٿا۔ تحريڪِ انصاف 9 مئي 2023 تي اهڙو رياست مخالف رستو اختيار ڪري چڪي آهي۔ ان مان کين ڪا ڪاميابي نه ملي ۽ پارٽي جو سياسي سفر به ڏکيو ٿي ويو۔ تنهن هوندي به ان سانحي مان سبق سکڻ ۽ سياسي جدوجهد جو رستو اختيار ڪرڻ بدران، هاڻي هڪ صوبي جو وڏو وزير اهڙي فورس ٺاهڻ تي اڙيل آهي، جيڪا جٿن جي صورت ۾ پنهنجو مقصد حاصل ڪرڻ جي ڪوشش ڪندي۔
