حيدرآباد(رپورٽر) سنڌ جي اديبن ۽ ساڃاهه وند ڌرين شاھ لطيف کي سنڌ جي روايتن، قدرن، امن ۽ ڀائيچاري جو شاعر قرار ڏيندي چيو آهي ته موجوده للڪارن جي دور ۾ سنڌ جي روايتن، قدرن ۽ پنهنجي ٻولي کي بچائڻ ۽ ڦھلائڻ لاءِ اسڪول ۽ ڪاليج سطح تي ٻارن لاءِ شاھ لطيف جا ميلا منعقد ڪرايا وڃن ته جيئن نئين نسل کي لطيف شناسائي جو پيغام ڏئي سگهجي. اهڙو اظهار هنن سنڌي ٻوليءَ جي بااختيار اداري پاران منعقد ڪرايل ٽيون ٻارن لاءِ شاھ لطيف جو ميلو جي افتتاحي تقريب کي خطاب ڪندي ڪيو. افتتاحي تقريب کي صدارت ڪندي اڳوڻي سينيٽر سسسئي پليجو چيو ته لطيف دنيا جو عظيم ۽ آفاقي شاعر آهي، هن لاءِ سنڌ ئي مقدس آهي هن چيو ته لطيف جو فلسفو ۽ سندس پيغام اسان لاءِ وڏو مورچو ۽ هٿيار آهن، هن چيو ته سنڌ ماضي ۾ آزاد وطن رهيو آهي ٻيو دشمن ملڪ ان طرف ميري اک کڻي ڏسي ٿو ته ان وقت لطيف جي شاعري وسيلي دشمن کي چماٽ هڻي سگهون ٿا، اسان لطيف جي فلسفي تي ايڪي ۽ ٻڌي سان هلون ته ڪنهن کي سنڌ جي مٽي ڏانهن ميري اک کڻڻ جي جرئت نه ٿيندي. سنڌي ٻوليءَ جي بااختيار اداري جي چيئرمين ڊاڪٽر اسحاق سميجو چيو ته لطيف ئي ٻڌايو آهي ته وطن کان وڌيڪ ڪا شئي ناهي ٿيندي اڄ سندس وطن سان محبت واري ڳالھ کي نئين نسل ڏانهن وٺي وڃڻ جي ضرورت آهي. قومي عوامي تحريڪ جي سربراهه اياز لطيف پليجي چيو ته” اڄ جا ٻار اهي ذرا آهن جن مان معاشرا ٺهڻا آهن ان لاءِ ضروري آهي ته سنڌ جي تعليم کاتي، اسڪولن، ڪاليجن ۽ ادارن ۾ سڀ کان وڌيڪ پروگرام ٻارن ۽ نوجوانن لاءِ ڪرڻ گهرجن، ان سان ئي لطيف جي امن، محبت، انسانيت جي فلسفو ايندڙ نسل طرف منتقل ٿيندو. سنڌ ايجوڪيشن فائونديشن جي مينيجنگ ڊائريڪٽر گھنور خان لغاري چيو ته سنڌ ايجوڪيشن فائونديشن 3 هزار اسڪول هلائي رهيو آهي. جنهن ۾ يارنهن لک ٻار پڙهن ٿا ۽ انهن ٻارن ۾ 45 سيڪڙو نياڻيون پڙهن ٿيون، مون جڏهن اسڪولن ۾ ڏٺو ته ٻارن کي سنڌي پڙهائيندڙ استادن کي سنڌي پڙهائڻ نه پئي اچي پوءِ مون ٻولي اٿارٽي جي چيئرمين سان ملاقات ڪئي ۽ ٻنهي ادارن سنڌي پڙهائيندڙ استادن جي تربيت جو پروگرام شروع ڪيو آهي اها به لطيف جي ٻولي جي خدمت آهي. انسٽيٽيوٽ آف سنڌولاجي جي ڊائريڪٽر ڊاڪٽر فياض لطيف چيو ته اسان وٽ مصنوعي شيون اچي ويون آهن. جن جو پنهنجي روايتن سان ڪو واسطو ناهي ان ڪري پنهنجي ورثي کي ايندڙ نسلن تائين منتقل ڪرڻ لاءِ ٻارن کي لطيف سان ملائڻ گهرجي ناليواري محقق ۽ ليکڪ ڊاڪٽر احسان دانش چيو ته لطيف هر نسل ۽ هر عمر جو شاعر آهي، گهٽي ۾ پنندڙ پينو فقير جي زبان تي به لطيف ملندو ته پورهيت کي به لطيف ياد هوندو. لطيف همت ڏيندڙ ۽ اتساهيندڙ شاعر آهي جنهن مورڙي کي پنهنجو هيرو بڻايو ان پيغام ۽ فلسفي کي نئين نسل ڏانهن منتقل ڪرڻ جو ذريعو هن کان وڌيڪ ٻيو نٿو ٿي سگهي. ناليواري شاعر علي آڪاش چيو ته لطيف وٽ محبت آهي هن وٽ مذهبي تنگ نظري ناهي، هن همت جو جذبو ڏنو آهي ان جذبي کي پنهنجي ٻارن تائين پهچايون ته سنڌ ۽ سنڌي ٻولي کي ڪو خطرو ناهي.
