ممبئي (ويب ڊيسڪ)ڀارتي وومين ڪرڪيٽ ٽيم جي نائب ڪپتان ۽ اسٽار بيٽر سمرتي منڌنا ۽ گلوڪار پالاش موچل جي شادي 23 نومبر تي ٿيڻي هئي، جيڪا اوچتو ملتوي ٿي وئي.
سمرتي جي پيءُ سرينواس منڌنا کي شادي جي تيارين دوران دل جو دورو پيو، جنهن سبب کيس فوري طور اسپتال منتقل ڪرڻو پئجي ويو.
ٻئي ڏينهن پالاش موچل کي به طبعيت بگڙجڻ تي اسپتال نيو ويو، پوءِ کيس ممبئي منتقل ڪيو ويو، سمرتي جي بزنس مئنيجر موجب، شادي ملتوي ڪرڻ وارو فيصلو خانداني ايمرجنسي صورتحال سبب ڪيو ويو.
ان دوران سوشل ميڊيا سمرتي ۽ پالاش پنهنجي انسٽاگرام بائيو ۾ هڪ ئي وقت ”نظر لڳڻ وارو“ ايموجي شامل ڪيو، جنهن مداحن کي تجسس ۾وڪوڙي ڇڏيو.
ٻنهي شخصيتن جي خانداني ذريعن موجب، شادي ملتوي ڪرڻ جو واحد ڪارڻ صحت جا مسئلا آهن، پر سمرتي جي انسٽاگرام تي شادي سان لاڳاپيل پوسٽون هٽائڻ سبب وڌيڪ سوالن جنم ورتو، جيتوڻيڪ گلوڪار سان سندس ڪجهه تصويرون اڃا تائين سندس اڪائونٽ تي موجود آهن.
پالاش جي ماءُ اميتا موچل جو چوڻ آهي ته ٻنهي خاندانن لاءِ هي ڏکيو وقت آهي، سمرتي ۽ پالاش ٻئي پريشان آهن، پالاش پنهنجي ڪنوار کي گهر وٺي اچڻ جو خواب ڏٺو هو.
هن چيو ته سڀ ٺيڪ ٿي ويندو ۽ شادي جلدي ٿيندي، ٻنهي خاندانن کي اميد آهي ته صورتحال بهتر ٿيڻ کانپوءِ شادي جي نئين تاريخ طئي ڪئي ويندي.
ٻئي پاسي سمرتي جي پيءُ ۽ پالاش ٻنهي کي اسپتال مان ڊسچارج ڪيو ويو آهي، پر شادي جي نئين تاريخ اڃا تائين نه ٻڌائي وئي آهي.
هوڏنهن ڀارتي ٽيم جي اسٽار بيٽر جئميما روڊريگز وومين بگ بيش ليگ تان هٿ کڻي ورتو آهي ته جيئن ڏکئي وقت ۾ هوءَ سمرتي سان گڏ رهي سگهي، جنهن تي مداح مختلف قسم جون اڳڪٿيون ڪري رهيا آهن.
