اسلام آباد (ويب ڊيسڪ) سپريم ڪورٽ پنهنجي تازي فيصلي ۾ واضح ڪيو آهي ته مسلم فيملي لاز آرڊيننس 1961 جي قلم 7 موجب ڀلي طلاق ٽن طلاقن جي صورت ۾ ڏني وڃي يا ڪنهن ٻي شڪل ۾، قانوني طور اها 90 ڏينهن جو مدو پورو ٿيڻ کان اڳ لاڳو نٿي ٿي سگهي.
چيف جسٽس يحيٰ آفريدي جي سربراهي ۾ 3 رڪني بينچ ٻڌڻي ڪئي، جنهن ۾ جسٽس محمد شفيع صديقي ۽ جسٽس ميان گل حسن اورنگزيب شامل هئا.
بينچ محمد حسن سلطان طرفان داخل طلاق بابت درخواست اڪلائيندي چيو ته جيڪڏهن مڙس نڪاح نامي ۾ بنا شرط زال کي طلاق جو حق ڏئي ٿو ته زال کي طلاق واپس وٺڻ جو مڪمل حق حاصل رهي ٿو.
عدالت سنڌ هاءِ ڪورٽ جي 7 آڪٽوبر 2024 جي فيصلي کي برقرار رکندي چيو ته ڌرين 2016 ۾ شادي ڪئي هئي ۽ نڪاح نامي جي شق 18 تحت مڙس پنهنجي گهرواري موريل شاهه کي غير مشروط طور طلاق جو حق ڏنو هو.
فيصلي موجب موريل شاهه 3 جولاءِ 2023 تي قلم 7 (1) تحت طلاق جو نوٽيس جاري ڪيو پر قانوني مدو پورو ٿيڻ کان اڳ 10 آگسٽ 2023 تي ان ڪارروائي کي واپس وٺي ڇڏيو، جنهن کانپوءِ لاڳاپيل آربيٽريشن ڪائونسل جي چيئرمين طلاق جي ڪارروائي ختم ڪري ڇڏي.
