راولپنڊي (ويب ڊيسڪ) ڊي جي آءِ ايس پي آر ليفٽيننٽ جنرل احمد شريف چوڌري افغان طالبان کان مطالبو ڪندي چيو آهي ته جيڪڏهن افغانستان ۾ موجود دهشتگرد پاڪستاني آهن ته اسان جي حوالي ڪيو وڃي.
پاڪ فوج جي ترجمان اداري آءِ ايس پي آر موجب، 25 نومبر تي ڊي جي آءِ ايس پي آر جي سينيئر صحافين سان ملڪي سلامتي وارن معاملن تي تفصيلي ڳالهه ٻولهه ٿي.
ڊي جي آءِ ايس پي آر ٻڌايو ته هلندڙ سال سڄي ملڪ ۾ 67023 انٽيليجنس بيسڊ آپريشن ڪيا ويا، خيبرپختونخوا ۾ 12857 ۽ بلوچستان ۾ 53309 انٽيليجنس بيسڊ آپريشن ٿيا ۽ هن سال مجموعي طور 1873 دهشتگردن کي جهنم ڀيڙو ڪيو ويو جن ۾ 136 افغاني به شامل آهن.
سندس چوڻ هو ته 4 نومبر 2025 کان هيل تائين دهشتگردي خلاف 4910 انٽيليجنس بيسڊ آپريشن ڪيا ويا، جنهن دوران 206 دهشتگرد ماريا ويا.
هن چيو ته بارڊر مينيجمينٽ بابت سيڪيورٽي ادارن خلاف ورغلائيندڙ پروپيگينڊا ڪئي ويندي آهي، پاڪ–افغان سرحد نهايت ڏکين ۽ خطرناڪ رستن تي ٻڌل آهي، ڪي پي ۾ پاڪ–افغان بارڊر 1229 ڪلوميٽر تائين پکڙيل آهي، جنهن ۾ 20 ڪراسنگ پوائنٽس آهن، بارڊر تي پوسٽن جو فاصلو 20 کان 25 ڪلوميٽر تائين به آهي.
ڊي جي آءِ ايس پي آر موجب، بارڊر فينس تيستائين اثرائتي نٿي ٿي سگهي، جيستائين اها آبزرويشن ۽ فائر سان ڪور نه هجي، جيڪڏهن هر 2 کان 5 ڪلوميٽر بعد قلعو ٺاهيون ۽ ڊرون سرويئلينس به ڪيون ته ان لاءِ وڏا وسيلا گهربل هوندا، پنجاب ۽ سنڌ جي ابتڙ ڪي پي ۾ سرحد جي ٻنهي پاسي ورهايل ڳوٺ آهن، جتي اچ وڃ ڪنٽرول ڪرڻ وڏو چئلينج آهي.
ڊي جي آءِ ايس پي آر جو چوڻ هو ته دنيا ۾ بارڊر مينيجمينٽ هميشه ٻئي ملڪ گڏجي ڪندا آهن، پر افغانستان مان دهشتگردن جي دراندازي لاءِ افغان طالبان مڪمل سهولت فراهم ڪن ٿا، جيڪڏهن سرحد سان لڳندڙ افغان علائقن کي ڏسئون ته ڪمزور انتظامي ڍانچو گورننس مسئلن ۾ واڌارو ڪري ٿو، انهن بارڊر علائقن ۾ پوليٽيڪل ٽيرر ڪرائيم ڳٺ جوڙ آهي ۽ فتنه الخوارج وارا سهولتڪاري ڪن ٿا.
هن چيو ته پاڪستان جو دوحا معاهدي بابت موقف واضح آهي ته افغان طالبان دهشتگردن جي سهولتڪاري بند ڪن، افغانستان ۾ دهشتگرد تنظيمن جا مرڪز، القاعده، داعش ۽ ٻين جي قيادت موجود آهي، انهن کي اتي ئي فنڊنگ ۽ هٿيار ملن ٿا جيڪي پاڪستان خلاف استعمال ٿين ٿا، پاڪستان سڀ ثبوت افغانستان آڏو رکي چڪو آهي جيڪي هو نظرانداز نٿا ڪري سگهن.
سندس چوڻ هو ته جيڪڏهن تصديق جوڳو ميڪينزم ٽِين ڌر کي رکڻو آهي ته پاڪستان کي ڪو اعتراض ناهي، ٽياڪڙ ملڪن کي به مڪمل آگاهي ڏني وئي آهي، فتنه الخوارج بابت طالبان رجيم جي اها دعويٰ ته ”هو پاڪستاني آهن، لڏپلاڻ ڪري آيا آهن ۽ اسان جا مهمان“ غير منطقي آهي.
ليفٽيننٽ جنرل احمد شريف جو چوڻ هو ته طالبان رجيم وٽ غير رياستي ڌريون آهن جيڪي خطي جي ملڪن لاءِ خطرو آهن، پاڪستان جو مطالبو آهي ته افغان طالبان رياست وانگر رويو اختيار ڪن.
هن چيو ته افغان طالبان عالمي برادري سان دوحا معاهدي ۾ دهشتگردي لاءِ سرزمين استعمال نه ٿيڻ جو وعدو ڪيو هو، پر اڃا تائين ان تي عمل ناهي ڪيو ويو.
ڊي جي آءِ ايس پي آر چيو ته طالبان رجيم افغان قوم جي نمائندگي نٿي ڪري، ڇو ته اها سمورين قومن ۽ 50 سيڪڙو عورتن جي نمائندگي نٿي ڪري، پاڪستان جو افغان عوام سان ڪو مسئلو ناهي، مسئلو طالبان رجيم سان آهي، پاڪستان ۽ افغانستان ۾ واپار جي بندش سيڪيورٽي ۽ عوام جي جان ۽ مال جي تحفظ سان جڙيل آهي، رتوڇاڻ ۽ تجارت گڏ نٿي هلي سگهي، اسان سٺي يا بُري دهشتگرد ۾ فرق ناهيون ڪندا، اسان لاءِ دهشتگرد اهو ئي آهي جيڪو جهنم ڀيڙو ٿي چڪو آهي.
ليفٽيننٽ جنرل احمد شريف چيو ته افغان پناهگيرن جي باعزت وطن واپسي واري عمل تحت 2024 ۾ 366704 ماڻهن کي واپس موڪليو ويو، 2025 ۾ 971604 افغان شهري وطن واپس ويا، جڏهن ته رڳو نومبر ۾ 239574 افغان شهري ڊي پورٽ ڪيا ويا.
هن چيو ته ڀارت ۾ خودفريبي واري سوچ ۾ وڪوڙيل قيادت حاوي آهي، ڀارتي آرمي چيف جو بيان ته اسان آپريشن سندور دوران هڪ ٽريلر ڏيکاريو خودفريبي واري سوچ جي عڪاسي ڪري ٿو، جنهن ٽريلر ۾ 7 جهاز تباهه ٿيا، 26 هنڌن تي حملو ٿيو ۽ S-400 جون بيٽريون تباهه ٿي ويون ته اهڙي ٽريلر تي آڌاريل فلم سندن لاءِ ڀوائتي فلم بڻجي ويندي.
هن چيو ته آپريشن سندور ۾ شڪست کان پوءِ بار بار ڀارتي بيان عوامي ڪاوڙ ماٺي ڪرڻ جي ڪوشش آهن، جيڪڏهن ڪو به ملڪ طالبان رجيم کي فوجي سامان ڏئي ٿو ته اهو دهشتگردن جي هٿ ئي چڙهندو.
هن چيو ته رياست ۽ ادارن خلاف زهريلو بيانيو گهڙيندڙ سوشل ميڊيا اڪائونٽس پرڏيهه مان آپريٽ ٿين ٿا، پاڪستان مان ٻاهر ويهي هتان جي سياست ۽ ٻين معاملن ۾ زهر ملائڻ جي ڪوشش ڪئي ويندي آهي، پرڏيهه مان آپريٽ ٿيندڙ سوشل ميڊيا اڪائونٽس هر وقت پاڪستان خلاف بيانيو ٺاهڻ ۾ رڌل آهن، اها ڳالهه واضح آهي ته جيڪا سوشل ميڊيا پاڪستان ۾ هلي رهي آهي، حقيقت ۾ ان جي پٺيان پرڏيهي هٿ آهي.
ڊي جي آءِ ايس پي آر جو وڌيڪ چوڻ هو ته دهشتگردي تي سمورين حڪومتن ۽ پارٽين جو اتفاق آهي ته ان جو حل نيشنل ايڪشن پلان ۾ آهي، ان پلان کي عملي جامو پهرائڻ لاءِ بلوچستان ۾ هڪ مضبوط نظام واضح ڪيو ويو جڏهن ته ڪي پي ۾ ان جي کوٽ نظر اچي ٿي.
