جنيوا (ويب ڊيسڪ) گڏيل قومن موجب فلسطين جي والاريل اولهندي ڪناري ۾ ٻن سالن دوران اسرائيلي فوج ۽ يهودي آبادڪارن هڪ هزار کان وڌيڪ فلسطينين کي شهيد ڪيو جن ۾ 233 ٻار به شامل آهن.
جنيوا ۾ پريس ڪانفرنس ڪندي گڏيل قومن جي انساني حقن بابت ڪمشنر ووالڪر ترڪ جي ترجمان جو چوڻ هو ته ست آڪٽوبر 2023ع کان هيل تائين اسرائيلي فورسز ۽ آبادڪارن والاريل اولهندي ڪناري ۾ 1030 فلسطينن کي قتل ڪيو جن ۾ 233 ٻار پڻ شامل آهن.
ترجمان جو چوڻ هو ته والاريل اولهندي ڪناري ۾ اسرائيلي فورسز ۽ آبادڪارن جي تشدد ۾ گذريل ٻن سالن دوران اضافو ٿيو، جنهن جو ڪو به جوابده نه آهي.
سندس چوڻ هو ته هو خميس تي جنين اسرائيلي بارڊر پوليس هٿان ٻن فلسطينين جي سرعام قتل تي صدمي ۾ آهي.
ترجمان موجب، اسرائيلي فوج جي طاقت جي غيرقاني استعمال ۽ اسرائيلي آبادڪارن جي وڌندڙ تشدد لاءِ ڇوٽ ختم ٿيڻ گهرجي، فلسطينين جي قتل جي آزداڻي، ترت ۽ اثرائتي جاچ ڪئي وڃي.
گڏيل قومن جي انساني معاملن جي رابطا آفيس ( او سي ايڇ اَي) جي رپورٽ موجب، والاريل اولهندي ڪناري ۾ مسلسل تشدد جاري آهي ۽ روزاني بنيادن تي جاني ۽ مالي نقصان ۽ بي دخلي جا واقعا پيش اچي رهيا آهن.
رپورٽ موجب، هلندڙ سال جي شروعات کان هينئر تائين اسرائيلي آبادڪارن جي 1600 کان وڌيڪ حملن جي نتيجي ۾ فلسطينين جو وڏو جاني ۽ مالي نقصان ٿيو آهي، حملن ۾ زخمي ٿيندڙ فلسطينين جو انگ هزار کان مٿي آهي، جن ۾ گهڻي ڀاڱي جسماني تشدد، پٿراءُ يا ڳوڙا آڻيندڙ سبب متاثر ٿيا آهن.
رپورٽ ۾ ڄاڻايو ويو آهي ته لڳ ڀڳ ست سئو فلسطيني سڌي ريت اسرائيلي آبادڪاري هٿان زخمي ٿيا جڏهن ته ٻيا اسرائيلي فورسز هٿان زخمي ٿيا، ڄاڻايل زخمين جو انگ 2024 ۾ آبادڪارن جي حملن ۾ زخمي ٿيندڙ فلسطينين جي ڀيٽ ۾ ٻيڻو آهي.
