اسلام آباد (بيورو) سينيٽر سيف الله ابڙو طرفان اين ايڇ اي آفيسرن کي ڊي چوڪ تي لٽڪائڻ جو مطالبو ڪيوويو آهي، سينيٽ جي مواصلات واري ڪاميٽي جي اجلاس دوران سينيٽر سيف الله ابڙو نيشنل هاءِ وي اٿارٽي جي آفيسرن تي بدعنواني ۽ ڪرپشن جي الزامن جي بنياد تي کين ڊي چوڪ تي لٽڪائڻ جو مطالبو ڪري ڇڏيو، سينيٽر ڪامل علي آغا جي صدارت هيٺ پارليامينٽ هائوس ۾ سينيٽ ڪميٽي جو اجلاس ٿيو، سيڪريٽري مواصلات ۽ چيئرمين اين ايڇ اي شرڪت نه ڪئي، اين ايڇ اي جي عملدارن ٻڌايو ته ڪيريج-3 منصوبي کي بليڪ لسٽ ڪمپني کي ڏيڻ بابت رپورٽ وزيراعظم کي پيش ڪئي وئي آهي، جڏهن ته لياري ايڪسپريس وي جي تعمير نو منصوبي ۾ مبينا بدعنواني سبب چيئرمين اين ايڇ اي کي تبديل ڪيو ويو آهي، سينيٽر سيف الله ابڙو سوال ڪيو ته اين ايڇ اي ايشيائي ترقياتي بينڪ کي ڇا لکيو آهي ۽ درخواست ڪئي ته اي ڊي بي سان ٿيل خط و ڪتابت ڪميٽي سان شيئر ڪئي وڃي، عملدارن ٻڌايو ته ايشيائي ترقياتي بينڪ سڄي معاملي تي نظر رکي ويٺو آهي ۽ نئون ڪنٽريڪٽ ڏيڻ جي ڳالهه ڪري رهيو آهي پر اڃا ڪا تحريري هدايت جاري ناهي ڪئي وئي، سيف الله ابڙو چيو ته ڪميٽي سان غلط بياني ڪئي پئي وڃي، نااهل ڪمپنين کي ٺيڪا ڏئي منصوبن جي خرچن ۾ گهڻيون واڌايون ڪيون وڃن ٿيون، جڏهن ته اين ايڇ اي جو هڪ جونيئر آفيسر چوريءَ جو دفاع ڪري رهيو آهي، ڪميٽي ميمبر اين ايڇ اي خلاف پريس ڪانفرنس ڪندا ۽ آفيسرن کي ڊي چوڪ تي لٽڪايو وڃي. هن وڌيڪ دعويٰ ڪئي ته اين ايڇ اي جو ڊپٽي ڊائريڪٽر سخر عبدالجبار شيخ ماڻهن کان ڪميشن گهري رهيو آهي ۽ چوندو آهي ته چيئرمين ۽ سيڪريٽري منهنجي کيسي ۾ آهن، سينيٽر ضمير گهمرو چيو ته ادارا پنهنجي بدعنوانين تي پردو وجهن ٿا ته آءِ ايم ايف رپورٽون جاري ڪري ٿو. هن مطالبو ڪيو ته هفتي اندر اين ايڇ اي اين ايڪس سي سي کي ٽرانچ-3 منصوبي جو ٺيڪو ڏيڻ بابت فيصلو ڪري، سينيٽر سيف الله ابڙو چيو ته افسوس سان چوڻو پوي ٿو ته اڳوڻو چيئرمين اين ايڇ اي ماتحت آفيسرن جي ڪري پنهنجو عهدو وڃائي ويٺو آهي، ايشيائي ترقياتي بينڪ سان مناسب خط و ڪتابت به نه پئي ڪئي وڃي، نئين چيئرمين اين ايڇ اي کي اداري ۾ موجود ڪرپٽ مافيا خلاف سخت ڪارروائي ڪرڻي پوندي. هن اهو به چيو ته اين ايڇ اي ڪيريج-3 کان پوءِ هڪ وڌيڪ قومي شاهراهه جي تعمير نو جو منصوبو به بليڪ لسٽ ڪمپني کي ڏئي ڇڏيو آهي.
