اسلام آباد/ڪراچي (عوامي آواز رپورٽ) وفاقي حڪومت 27 هين آئيني ترميم لاءِ تياريون شروع ڪري ڇڏيون آهن. وفاقي حڪومت پاران 27 هين آئيني ترميم جي تجويز ڪيل مسودي جا مکيا نقطا ظاهر ٿيا آهن.27 هين آئيني ترميم سان آرٽيڪل 243 ۾ ترميم ڪئي ويندي، جنهن جو مقصد آرمي چيف کي ڏنل فيلڊ مارشل جي عهدي کي آئين ۾ شامل ڪرڻ ۽ ان کي تسليم ڪرڻ آهي. تجويز ڪيل ترميم ۾ آئيني عدالتن جو معاملو پڻ شامل آهي، ايگزيڪيوٽو جي مئجسٽريٽ جي اختيار کي ضلعي سطح تي منتقل ڪرڻ پڻ تجويز ڪيل ترميم ۾ شامل ڪيو ويندو، ان سان گڏ سڄي ملڪ ۾ هڪ نصاب هجڻ جو امڪان به شامل هوندو. قانون واري وزير بئريسٽر عقيل ملڪ چيو آهي ته 27 هين ترميم تي بحث جاري آهي پر باضابطه ڪم شروع نه ٿيو آهي. هن چيو ته آرٽيڪل 243 ۾ ترميم جو مقصد آرمي چيف کي ڏنل فيلڊ مارشل جي عهدي کي تحفظ ڏيڻ آهي. ذريعن موجب، وفاقي حڪومت آئين جي 5 آرٽيڪلن ۾ ترميم چاهي ٿي، ان حوالي سان، تجويز ڪيل ترميم ۾ آئين جي آرٽيڪل 160، شق 3A، آرٽيڪل 213، آرٽيڪل 243 ۽ آرٽيڪل 191A ۾ ترميمن جون تجويزون شامل ڪيون ويون آهن. آرٽيڪل 160 جي شق 3A ۾ ترميم ڪرڻ جي تجويز ڏني وئي آهي، تجويز ڪيل ترميم تحت، وفاقي آمدني ۾ صوبن جي حصي بابت آئيني ضمانت کي ختم ڪرڻ جي تجويز شامل ڪئي وئي آهي. ساڳئي طرح، عدالتي ڍانچي ۾ وڏيون تبديليون ڪري آرٽيڪل 191A ۽ هڪ نئون آرٽيڪل شامل ڪرڻ جي تجويز به شامل آهي، جنهن مطابق نئين ڍانچي تحت هڪ آئيني عدالت يا هڪ سپريم آئيني عدالت قائم ڪرڻ جي تجويز ڏني وئي آهي. ذريعن موجب، تجويز ڪيل ترميم ۾ آئيني تشريح جي آخري اختيار کي تبديل ڪرڻ جي به تجويز آهي. ان کان علاوه، هاءِ ڪورٽ جي ججن جي منتقلي بابت آرٽيڪل 200 ۾ ترميمون پڻ شامل ڪيون ويون آهن. تعليم ۽ آبادي جي منصوبابندي جي شعبن کي وفاقي حڪومت جي ماتحت واپس آڻڻ جي تجويز آهي. ساڳئي طرح، آرٽيڪل 243 ۾ ترميم سان هٿياربند فوجن جي ڪمانن کي مڪمل طور تي وفاقي حڪومت جي ماتحت رکڻ جي تجويز شامل آهي. آرٽيڪل 213 تحت چيف اليڪشن ڪمشنر جي مقرري کي تبديل ڪرڻ جي تجويز پڻ مسودي جو حصو آهي. وفاقي حڪومت 27 هين آئيني ترميم جو تجويز ڪيل مسودو پيپلز پارٽي جي حوالي ڪري ڇڏيو آهي ۽ هن ترميم جي منظوري لاءِ پيپلز پارٽي کان مدد طلب ڪئي آهي.
