بيجنگ (ويب ڊيسڪ) چين ٻي عالمي جنگ ۾ فتح جي 80هين سالگرهه جي موقعي تي ٿيل پريڊ ۾ جديد بين البراعظمي اسٽريٽجڪ جوهري ميزائل DF-5C کي پهريون ڀيرو عوام سامهون پيش ڪري ڇڏيو.
چيني ميڊيا موجب اهو نئون ميزائل پنهنجي غير معمولي رينج سبب سڄي دنيا ۾ ڪنهن به هنڌ کي نشانو بڻائي سگهي ٿو.
ماهرن جو چوڻ آهي ته ان جي رينج 20 هزار ڪلو ميٽرن کان وڌيڪ آهي ۽ اهو دفاعي نظام کي ناڪام بڻائڻ ۽ انتهائي درستگي سان هڪ وقت ۾ ڪيترن ئي هدفن کي نشانو بڻائڻ جي صلاحيت رکي ٿو.
ماهرن موجب ان ميزائل جي هڪ وڏي خوبي ان جي نئين بيهڪ آهي، ان کي 3 حصن ۾ 3 مختلف گاڏين ذريعي منتقل ڪري سگهجي ٿو، جنهن سان لانچ لاءِ ان جي تياري ۾ گهٽ وقت لڳندو آهي.
ماهرن جو چوڻ آهي ته غير معمولي رينج جو مطلب اهو آهي ته چين وٽ دنيا جي ڪنهن به حصي ۾ موجود اهڙن فوجي هدفن تي جوابي ڪارروائي ڪرڻ جي صلاحيت موجود آهي، جيڪي ان لاءِ جوهري خطرو بڻجي سگهن ٿا.
